Vawiin 27 Sep 2023 (Nilaini) ni hian Ailawng Khuangchera Hall-ah World Tourism Day hman a ni a, he hun hi Lalrintluanga Sailo, Govt Deputy Chief Whip chuan Khuallian niin a hmanpui.
He huna Khuallian Lalrintluanga Sailo chuan,”Vawiin hun pawimawh takah khuallian tura min sawm hi ka lawm hle a, hetiang lamah experience neilo tak nimah ila, keini bialchhungah Tourism lama hmun pawimawh tak tak kan neih avangin heti lamah hian kan ngaihtuahna erawh kan seng lo thei lo a, aveitu tak zingah te pawh kan tel ve ta a ni. Hmun nuam leh tlawh chakawm tak tak kan neih tawh bakah, hmun dangah pawh nasa zawka cheibawla Central India thlenga beng leh mit titlai thei kan nei hi kan vannei hle a ni, a ti.
Govt Deputy Chief Whip chuan, heng kan hmun pawimawh tak tak te hi mitam tak tân eizawnna ṭhaah kan siam zel aṭul, Pu Rokunga hla in, ‘Hnamdang hmusit mai loin Ṭhianah i siam ang u,’ atih kha atakin kan zawm anga heng kan tlangram hmun mawi leh nalh tak tak te hmang hian kan Economics kan chawikang zel dawn a ni. Tin, Ram dang leh Hnamdang khualṭha kan neihin helaia kan eiduh zawng leh tih duh zawng te hi lo hluiin lo tihpui thiam ila, an ei ṭhan loh leh tih ngailoh ang taka rawn chettlata rawn awm hi an tân thil thar anih miau vangin a hlu em em ani tih i hria ang u” tiin tourism lama kan mamawh hrang hrangte a sawi bawk.
He hunah hian Pu Lalthlamuana, Ailawng Village Eco Tourism Society Chairman chuan, Ailawng Khuain Tourism atana hmunhma ṭha an ngah thu leh sorkarah pawh ruahmanna tamtak an siam te hmalaksak tura ngenna an siam bakah hmasawnna tura ruahmanna an siam te asawi bawk.
Pu Jonathan Lalrinawma HoD Dept of Hospitality & Tourism Management ICFAI chuan, vawiina Ailawng khuaah ngei Tourism Day an hmang thei chu lawmawm atih thu bakah Tourism awmzia te sawifiahin, Tourism hian mi tam tak eizawnna a pe a, mihring hmasawnna tam tak siamtu a ni. Keini Ramah pawh Tourism lama hmasawnna tam tak kan neih tawh te vawng ṭha ila, abakah hmasawnna i zawng zel ang u, tiin kalkhawm te hmaah asawi bawk
He hun hruaitu Francis Lalmalsawma Sailo chuan,”World Tourism Day hi helaiah kan la hmang ve ngai lo a, vawiin World Tourism Day anih ang leh Ailawng khua pawh Eco Tourism hmun pawimawh tak anih angin he hun kan hmanna Ailawng khua hian hma asawn zel ka beisei,” tiin asawi bawk a ni.
