Tlawmngai pawl pakhat, Youth for Environment Justice Mizoram(YEJM) aiawh te chuan vawiin khan Larsap Hari Babu Kambhampati an kawm a. He hunah hian YEJM hruaitute leh Larsap chuan Smuggler ten ramdang atanga ramsa an rawn tawlhruk te dan leh thupek kengkawhtu ten an lo man thu leh heng ramsate lo enkawl lailawkna kalpui dan leh a rang lama enfiah a pawimawhna te an sawiho a ni.
YEJM hruaitute chuan Larsap Hari Babu Kambhampati hnenah ram pawnlam chauh a awm, ramsa thenkhat (exotic animals) te tunlai hian Mizoramah dan leh thupek kengkawhtuten man an nei tam tawh hle tih an sawi a. Heng pawnlam ramsate hi an rin dan chuan South East Asia ram thenkhat atangin ramri kana Mizoramah rawn luhpuia hmundangah te la zawrh/hralh tur niah an ngai tih an sawi a ni.
YEJM chuan rampawn lam ramsate hi dan leh thupek kengkawhtuten an lo man chu tha a nih thu sawiin an ramsa man te lo enkawl lailawkna erawh duhthu a sam lo takzet tih an sawi a. Pawnlam ramsa hren lailawk te hi bawm te tak teah te, sahuanah leh a rem chang changah duhdah takin khung an ni a. Chaw tha leh an mamawh ang chite pek a ni lo te chu tha an tih loh thu te an sawi a. Heng pawnlam ramsa mankhawm te hian hrileng lo keng lut thei an nih thu te leh Mizoram chhunga ranvulh te leh ramsate tan hri thalo an rawn pu lut thei a. Tuna enkawlna pek an nih dan hi a him lova, Aizawlah leh Champhaiah heng ramsa mankhawmte lo enkawl lailawkna(holding facility) hi siam thuai a ngai an ti a ni.
Hemi chungchangah hian YEJM chuan Larsap chu hemi kaihhnawih Department hotute sawipui turin an ngen a. Environment tih chereu na lam hawia hmalakna thenkhat leh Governor inrawlhna tura an ngaih lai te pawh an sawipui bawk.
Larsap chuan Mizoram thalaite zingah kan chhehvel leilung leh boruak min tuamtu chhe mek zel vei a, a siamthat hna thawk tura rawn pen chhuak an awm belh mek chu thil lawmawm tak a ni a ti a. Enrvironment chhe mek hi khawvelin a mangan pui mek a ni a; Mizoramah pawh changkanna leh hmasawnna in a ken tel thil thenkhat avanga kan environment chhe mek te siam that ngai a awm nual a ni a ti. YEJM member te leh environment humhalh kawnga tui thalai rual te chu vawikhat chauh hman theih sarang hmang lo tura mipui zirtirna pe a tan la zel turin a chah a. A hmatawnga hmalakna atan luikawr leh lui dunga sarang lam paih tih tawp a nih theih nan chak taka hmalak a pawimawh tih a sawi bawk.
