Viksit Bharat Young Leaders Dialogue 2025, January 10–12, 2025 chhunga Bharat Mandapam, New Delhi-a neihah Grace Lalrinpari Hauzel, Pachhunga University College history department-a fourth-semester zirlai chu Youth Representative of India atana thlan zingah a tel.
Ṭhalai, ram hruaitu ni thei tura beiseiawmte inkhawmpui Viksit Bharat Young Leaders Dialogue 2025-a telte hi state hrang hrangin anmahni state ṭheuha inelna hrang hrang buatsaih a an thlan te an ni a, a team angin inelna hrang hrangah an tel a, mimal-tin pawh an tih ṭhat dan uluk taka en a ni. Grace Lalrinpari hi inelna hrang hranga ti ṭha ber te zinga mi niin India ram ṭhangtharte aiawh tlaka ngaih a ni. Prime Minister Narendra Modi telna inkhawmah thu sawi tir a nih bakah dawhkan khatah chawchhun kilho tir a ni bawk.
Viksit Bharat Young Leaders Dialogue hi tunhma kum 25 chhung zeta National Youth Festival an lo hman ṭhin thlakna a ni a, Prime Minister Narendra Modi-a’n nikum India Independence Day-a a sawi – ṭhalai political party-a telna nei lo mki nuai khatte politics-a hman ṭangkai a, developed India (Viksit India) atana an ngaihdan te an thawh ve theihna tur remchang siamsak a tih nena inzula ruahman a ni.
Prime Minister hian he ṭhalai inkhawmpui hi telpuiin zalen taka inkawmna hun ṭha leh remchang a awm theihna turin chawchhun a kilpui nghe nghe a ni. Ṭhalaite pawhin an ngaihdan te, an duhdan leh a taka an tawnte tlang takin an sawi a. Hei hi ram rorelna kawnga ṭhalaite inhnamhnawih tir leh mawhphurhna nei nia inhria a, neitu chan chantir tumna pakhat a ni.
Mizoram aṭang hian he huna tel turin team li an kal a, an vaiin mi 12 niin chungzinga paruk chu Pachhunga University College zirlai an ni.
