Tunhnai khan naupang kum tling lo, Dan nena inrem lova che chu Internet Social Media hrang hrangah naupang hming, thlalak, video leh address a nihna tilang thei tura pholan leh puanzar a ni a, Mizoram State Commission for Protection of Child Rights (MSCPCR) chuan bawhzui nghalin a pho chhuaktu YouTubers leh Facebookers te lakah ni 09.01.2025 (Ningani) khan Cyber Crime Police Station Aizawl-ah FIR a thehlut.
Pu Jimmy Laltlanmawia, Chairperson, MSCPCR chuan tunhnaia Internet Social Media -YouTube, Facebook, WhatsApp leh Digital Media platform hrang hranga naupang Dan nena inrem lova che te hming, nihna, thlalak, video leh address te tarlan a ni leh thin chu ngaimawhawm a ti a; hei hi “The Juvenile Justice (Care & Protection of Children) Act, 2015, Section 74” chuan a khap tlat a ni a ti a.
“Hetianga naupangte hming, address, thlalak, video leh a dangte pholan a nih chuan nakin zela naupangte an lo than len huna khua leh tui tha an nih theihna tur kawng daltu leh midang ten an chhinchhiah bik theihna tur thil pawi tak a nih avangin Dan chuan a khap tlat a ni,” a ti a; “He Dan bawhchhetu chu thla 6 thleng lung-in tantir leh cheng nuai 2 thleng chawitira hrem theih an ni,” a ti bawk. Commission chuan Dan bawhchhetute chu hrem an nih theih nan hma a la zel dawn a, Internet Social Media leh Digital Media hmang tute chu fimkhur tur in a chah a ni.
