Zangnadawmna pek phutin kawngzawh

Aizawl August 18 : Vairengte leh Sairang inkar, National Highway No 6 & 306 four lane siam tuma ram neitute chuan zangnadawmna pek thuai phutin Kolasib ah kawng an zawh a. Environment Forest department-in tan chhan mumal nei loin zangnadawmna lak tur hi a tikhawtlai tih an sawi.
He kawng sial len turin ram a lak chhiat tur neitute intelkhawmna, NH 6 & 306 Land Owners Association hruaitute chuan Nilaini khan Kolasib-ah thuthar thehdarhtute kawmin, Vairengte to Sairang NH 6 & 306 zauh turah hian Competent Authority of Land Acquisition (CALA) chuan 3A notification a chhuah a. Kawng zauhna atana ram nei zawng zawng, sawrkar pass leh VC pass neite tarlan a ni. Sawisel duh nei tan hun hawn a ni a, chumi hnuah 3D notification chhuah leh a nih hnuah CALA thuchhuak angin kawngin a paltlang turte ram endik a ni tih an association chairman James Vanlalringa chuan a sawi.
Lungawilohna leh sawi duh nei tana hun hawn a nih chhungin ram neitu leh Mizoram sawrkar atangin sawiselna engmah a awm lo tih sawiin, “CALA chuan 3G turin ruahmanna a siam a, hemiah hian package indawtin NHDCIL-ah 3G approval dil a ni,” a ti. Kumin July 13 khan kawngpui laih zau hna thawktu tur NHIDCL chuan Kolasib District CALA (Kolasib addl DC ni bawk) hnenah cheque-in zangnadawmna tur a dah tawh laiin, Forest department-in kawngpui atanga meter 800 huamchhung an ram nia a hauh avangin zangnadawmna an lak tur hi hren sak an ni a, an lungawilo hle tih a sawi.
Forest department-in an ram nia an chhal chhungah mimal ram tam tak a awm tih James Vanlalringa hian a sawi a. “Ram neitu chhungkaw 1751 chuang kan awm mek a. Forest department tanchhan, Mizoram District Council (Forest Act) 1955/1965 hi dan hlui tawh leh tanchhan tlak tawh loh a ni. He dan hi 2021 April 12 khan Gauhati High Court Aizawl Bench chuan a lo nuaibo tawh bawk a ni,” a ti.
Forest department-in ‘forest reserved’ a tihah hian sawrkarin town village a puang vek tawh nia sawiin, “Sawrkar hmunhma tam tak, Kolasib DFO pisa ngei pawh hi forest reserved chhung a ni,” Land Owners Association chairman hian a ti. Forest department dan tanchhan chu sawrkarin ngaihtuah chiang a, dan hlui tawh hi siamthat emaw cancel emaw a tul tawha an ngaih thu a sawi.
Land Owners Association hruaitute chuan an harsatna tawh chu kumin July 7 khan chief minister hnenah ziaka an thlen thu leh Forest minister pawh tum hnih an hmu tawh thu an sawi. “Kan thu thlen kalzelah hian Revenue department chuan CALA hnenah CM-in ti tura a tih angin zangnadawmna pe chhuak turin an hriattir a, mahse Kolasib DFO-in ram lak chungchangah NHDCIL objection a pek avangin tun dinhmun hi kan thleng a ni,” an ti.
Zangnadawmna an hmuh thuai theihna’n hma lakpui tura sawrkar an ngen thu association hruaitute hian an sawi a. Kolasib district-a MLA pathumte pawh an harsatna chinfel sak a, a tul anga hma lakpui tura an phut thu an sawi bawk.
Thuthar thehdarhtute an kawm zawh hian Land Owner Association member-te chuan Kolasib Press Club atanga Kolasib DFO pisa thleng kawng zawhin, DFO Margareth Lalramchhani hnenah zangnadawmna an dawn tura harsatna awmte chinfel sak turin an ngen a, resolution an pass chu an hlan bawk. DFO chuan an thu thlente chu hemi chungchang ngaihtuah tura sawrkarin a tih, General Administration Department kaihhruaina hnuaia thutkhawm an neih hunah a thlen tur thu a lo hrilh a ni.