Zoram Driver Union (ZDU) huaihawtin Lirthei khalh fimkhurna hapta 41st Road Safety Week chu vawiin khan hawnna neih a ni. Ni 8 December atanga ni 15 chhung Lirthei khalh fimkhurna hapta Road Safety Week hi hman tur a ni dawn a ni.
Lirthei khalh fimkhur inzirtirna hapta hawnna pui ber Aizawl Chaltlang Lily veng a Zoram Drivers Union ZDU pisa kawta neih ah khuallian Aizawl Traffic Sr, SP Rodingliana Chawngthu chuan kum 2021 chhungin Mizoram ah Lirthei chetsualna accident vawi 48 thleng ah mihring 69 in nunna an chan a, hliam mi 121 an awm tih sawiin, heng Lirthei chetsualna thlen chhan ah hian za zela 52% chu tlanchak (Over Speeding) vang a ni a,chetsualna vawi 11 thleng chu zu leh a kahhnawih hmansual vanga thleng ani bawk, Lirthei chetsualna tum 2 thleng chu tlan lohna (Wrong side) a tlan vanga thleng anih thu SP Rodingliana Chawngthu chuan a sawi. Traffic SP chuan Lirthei chetsualna (Accident) titlem turin Lirthei khalhtu (Driver) te an pawimawh hle ati a, dan in a phalbak aia chaka lirthei khalh te, rui chunga khalh te bakah mahni side lo a tlan te, a hun leh hmun lo va Lirthei intlanpelh (Overtake) te tilo a, bungrua phurh theih baka aia tam phurh te leh bungrua phur Lirthei in mihring (Passenger) a phurh te chu dan phalloh a ni tih sawiin, Rodingliana Chawngthu chuan Traffic rules zawm chunga hawihhawm taka Lirthei khalhtuten an Lirthei an khalh a pawimawh ati. Traffic Sr SP chuan hetiang dan zawm duhlo leh dan palzut lui te chu Supreme Court committee on Road Safety in hrem theihna a pek angin an Driving License suspend emaw tihtawp sak bakah lung in tan theihna ani tih a sawi.
Lirthei khalh fimkhurna hapta hawnna inkhawm hi ZDU President Zothansanga chuan kaihhruaiin, tum 41 Road Safety Week hawnna chu Ribbon chepchatin Traffic Sr SP Rodingliana Chawngthu chuan a hawng a ni. Zoram Driver Union te chuan hunpui lo thleng tur atana kan in buatsaih mek lai hian Lirthei khalhtute chu fimkhur leh zual tura chahin zin veivak Lirthei khalhtute chu a bikin zu leh ruihhlo ti lo leh midang tana himlo leh tlan chak lutuk lo turin an ngen tih an sawi a ni.
