Aizawl, 20th April, 2023: Nimina neih zawh tak, Aizawl Veng pathum – Zemabawk, ITI leh Durtlang Leitan-a Local Council bye-election vote tla te chhiar zawh a ni ta a, Zemabawk leh Durtlang Leitanah te ZPM candidate-te thlantlin niin, “ZPM General Headquarters chuan kan lawmpuiin duhsakna kan hlan a. Hetihlai hian ITI Vengah chuan vote 106-in a vanduai zawkah kan tang hlauh mai a, chutihrualin kan hmasawnnaah erawh lawmthu kan sawi a, kan Candidate Ricky Vanlalhruaia pawh a kal zelna turah duhsakna kan hlan e. Tin, inthlanna buaipuitu sawrkar official-te chungah pawh lawmthu kan sawi a ni,” ZPM chuan an ti.
Lalliansawta, President chuan, “Zemabawk leh Durtlang Leitan LC Bye Election-ah Pathian leh mipui zarah sang takin hnehna kan chang hi a lawmawm hle mai, hetianga hlawhtlinna kan chan theihna tura thawktu zawng zawng chungah kan lawm em em a ni. Unit, Group leh Block hruaitute, General Headquarters aṭangin Co-ordination Committee leh Observation Team te, a enkawltu Organisation Department te an thawkrim hle. Mimal, Unit leh Block aṭangin ṭanpuina pawisa fai engemawzat kan dawng a, a va lawmawm em! Kan candidate leh an chhungte zawng zawng inpekna leh ṭhahnemngaihna avangin ZPM kan ropui ve mai chuah a ni. Heng bakah phone leh kawng hrang hranga kan hmalak ṭheuh luangkhawm te sawisen a ni lo a, kan lawm em em a ni. ITI Veng-ah erawh kan chak zo lo a, pawi kan ti hle; candidate leh party worker zawng zawng te thawhrimna kan hriatpui a, hlawhtlinna chan hun a la awm ngei ang tih kan beisei tlat a ni. Pathian ropui se la, sawrkar ṭha siam turin theihtawp i chhuah zel ang u,” a ti.
Lalduhoma, Leader chuan, “Pathian leh mipuite zarah a vawi thum nan, Bible-in sual tinreng bul a tih sum thiltihtheihna chu hnehin a awm leh ta a, lungthu a kim ta. Campaigner zawng zawngte chungah lawmthu ka sawi e. Tumah mawi lo taka che leh ṭawng awm lo va, Pathian hnena lawmthu sawi ṭawngṭai rualna kan nei ṭhin hi hmuh a va nuam em! ‘Ka thlarau zawkin le tih hi kan innghahna lo ni zel rawh se,” a ti a.
Vanlalhlana, ZPM Legislature Party Deputy Leader chuan, “Ka bial chhung Durtlang Leitana LC bye-election neihah ZPM candidate Pu Biakkima hneh taka min vote tlin saktu zawng zawngte chungah thinlung takin lawmthu ka sawi e. Durtlang Leitan, Zemabawk leh ITI Venga thawktu Headquaters, Block, Unit leh Campaigners hah taka thawktu zawng zawngte chungah lawmthu kan sawi a, Neutral ten in khawngaih vote hlu tak min pek avangin kan va lawm em. Lalpan in tha leh tui, sum leh pai sen zawng zawng te malsawmnain a let tam takin vur che u rawh se,” a ti bawk.
“Local Council member atana thlan thar zawng zawngte, kan ram leh hnam tan, kan khawtlang tan theihtawp chhuaha hna thawk turin ZPM chuan duhsakna kan hlan a; dikna, taimakna leh huaisena nen Zoram nuam siam tura tan la sauh sauh turin kan chah a ni,” an ti bawk.
