Aizawl, 23, Nov., 2022 : Aizawl West Jt. YMA Multipurpose Centre, Vaivakawnah vawiin khan Aizawl West-II MNF Block Conference neih a ni a. Khuallian Lalruatkima, MNF Adviser leh MoS chuan mi thar 239 a lawmlut a. He hunah hian Aizawl West-II bial chhunga Hnam Pasaltha rammu 172-te hnenah thilpek hlan an ni bawk.
Lalruatkima, Minister of State leh Bialtu MLA chuan thusawiin, MNF Sorkara Covid hripui leh harsatna tam tak karah bial chhunga inkalpawhna kawngpuite tihpuitlin chhoh a nih thu te, lungrem leh side drain tam tak siam a nih bakah Dintharah multi-level parking, a chunga futsal ground awm tur, Rs nuai 1200 senga sak turte, Tuikual North futsal ground thara grass phah tur leh Tuikual South-a volleyball court siam turte bakah hna dang tam tak thawh a ni, a ti a.
“Kan hnathawhte chu a tha, a tlo leh a mawi tur a ni. Hlep tam hi kan inenlna tur a ni lo a, hnathawh thatah kan inel tur a ni. Hei hi MNF kan danglamna tur a ni,” a ti.
Sorkar hmasa huna zu zawrh, sikul tan hma, zirtirtu indaih lohna leh thil dang dangah harsatna a awm tiin, MNF Sorkar chuan hmasawnna hna a thawk a. Zirna hi hmasawnna bulthut a nih angin zirtirtu tam tak lak belh an ni, a ti a. Kawngpui chhia siam that a ni a, nitin mamawhte pawh kan hnianghnar. Heng zawng zawng hi kohhran hote tawngtai chhuah sorkar kan ni a. Pathian leh kan ram tan titu party kan ni, a ti.
Lalruatkima chuan MNF Sorkarah Covid-19, raltlan, lirnghing bakah ramri-ah Assam police battalion ralthuam famkim nen an lo lut a, kan police hmun an luah a. Pathianin Israel-te a hruai angin, he sorkar hi Pathianin a hruai tlat a. Tlai dar 4-ah chuan kan sipaiten an hmun an luah leh vek thei a ni, a ti a. “Khawchhak unaute pawhin ei tur kan neih chhung chu chaw in nghei bik lo ang, an tihte kha hnam inpumkhatna tizualtu a ni a. Ramri buai lai kha fur hunlai a ni chungin thla li tla tur buhfai kan lo chhek khawl a ni,” a ti.
Hnam inpumkhatna tura MNF sorkar hmalakna sawiin, Zo Kutpui huaihawt a ni a, Tripura-ah bus tlantir a ni a. Langtlang sorkar din nan online RTI tihpuitlin a ni a, Lok Ayukta mumal tak din a ni a. Power decentralisation kan ti a – Sinlung Hills an inthlang tawh a. Lunglei Municipal Council kan din mek a. Lunglei MZU Southern Campus pawh tihhlawhtlin mek a ni, a ti.
Minister chuan tunhnaiah Assam nen ramri chungchang inbiakna an neih thu a sawi a, Assam lam chuan ramri chungchang ziakin in la rawn thlen ngai lo. State pahnih karah political talk pawh a la awm ngai lo an tih thu a sawi a. “Keini lamin Bengal Eastern Frontier Regulation 1875 kan tan chhan a, anni’n an pawm lo thung. Amaherawhchu, census nei tur leh inbiak chhunzawm turin kan inthlah a ni,” a ti a. Assam nen kan ramri chingfel turin Pu Zoramthanga kaihhruai sorkar a tha ber tiin, “Pu Zoramthanga hi inremna palai atan symbol a ni a, India sorkar pawhin a mamawh tak zet a ni. Vision thui tak neiin hma a la a. Thei nia inngai chuan kan ti hram zel a, thei lo nia inngaite chuan hmalak ngaihna an hre lo. Kan pu hi opposition ten nuih thin mah se, a kaihhruai sorkarah chuan Union budget-ah Bamboo link road leh Bypass road tur a lo chhuak thei a ni. Hetiang hi a la awm ngai lo,” a ti.
Aizawl West-II MNF Block Conference-ah hian bial chhunga party mipui 1400 chuang an tel a. He hunah hian hnam martar leh member boralte sunna hun an nei a. Hnam pasalthate chawimawina hun an hmang a. Bial chhung mite tan Phuithui khawl 90 semchhuah a ni bawk a.Tlai lamah ruai an theh bawk a ni.
