Aizawl South II Block Congress Committee buatsaihin vawiin khan Block Extended Meeting neih ani a. He hun hi Lal Thanzara, President MPCC leh Dr. Lalmalsawma Nghaka, Treasurer MPCC te chuan an hmanpui a ni.
He hun hmanpuitu Lal Thanzara chuan thusawiin, “Tuna kan sawrkar hrawn mek hi mipui duh danin enchhin a lo ni a, kan hotupa ber kan CM hi House chhungah leh pawnah pawh rawngbawltu ni si a thusawi duh dan hi a mak ka ti a. Nimin piah Remna ni lawmnaah pawh khan zirlai naupang politic la hrethiam lo te hmaa a thusawi duh dan te kha a mak a, mi rilru a diklo lama hruaikawi thei a ni. MP atanga an ban dan a sawi te kha, ka hriat hi a sual ta emaw ni ka ti, an ban dan kha Anti-defection vang niin ka hria. Hetianga a tawng fo chuan kan politic te hi a kal diklo chho mai ang tih ka hlau a ni.
“AMC inthlan hi a hun tak chu nakum kumtir lam a ni a, tuna kan sawrkar mek hian VC leh LC inthlan pawh an boruak that lai chuhin an pawt hma duh a, AMC pawh hi an pawt hma leh duh mai dawnin kan hria a.
“Tuna kan sawrkar hrawn mek hi an fel khawp a, kan Unit President nilai te hi an party zawm turin an sawm duh a, chuvangin kan beng kan chhit ve kar a ngai a ni.
“ZPM hian sawi hreh an nei lova, social media ah pawh dawt nen nasa takin tan an la a, hei hian kan ram politic a ti chhe mek a ni. Central-in a hrek mek avangin sum lengvak a tlem a, sualna a pung a, ruihhlo tawlh a hluar mek a ni. Heng lak atang hian zoram hi chhanchhuah a ngai a, heng lak atanga zoram chhanchuak tur hian MNF hi mipuii an that an ring lova, Congress chauh hi Zoram chhanchhuak thei turin Mipui pawhin min beisei kan ni, chuvangin kan party hian tan kan lak a tul hle a ni.” a ti.
He hun hi H. Lalduhawma Aizawl South II Block Congress Committee President in a kaihruai a. Dr. Lalmalsawma Nghaka, Treasurer MPCC in thusawina hun a hmang bawk.
