ZPM Party chuan vawiin khan chhung inkhawm neiin, Education Minister Dr. Vanlalthlana chuan, “Zirlai pawlte an harh thar zel a, kalphung thar sorkar hnuaiah an thik thu pawh a chhe tain sorkar hmalak mekna thlawp chunga vawiina Quality Education Humhalhna Kawngzawh an nei ta hi a lawmawm takzet a ni. Tum 7 zet sorkar hmasaten an pawhsei sak tawh; tuna Part time-a thawk mi 29 te hi chhungkaw eizawngtu an nihnaah khawngaihna nen, sorkarin an chungah rorelin a tawp nan hun a siamsak ve leh a, show cause notice pek an ni tawh. Vawiina zirlai pawlte kawngzawh chhan bak pawh hi sorkar chuan zirna siamthatna tur kawngah hma a la mawlh mawlh mek a ni,” a ti.
Dr. Vanlalthlana chuan, “Sawrkar hmasaa MPSC kaltlanga an lak thlap, Unqualified Asst. Professor, kum 2008 atanga thawk tawhte kan zirlaiten kawng an zawhpui ngam ta hi a lawmawm hle. Tuna Unqualified Part time-a thawk mi 29 an aupui bakah; College pangngai, Law College leh Mizoram Polytechnic Lungleia Unqualified Contract Asst. Professor te pawh hi sorkarin show cause notice a pek vek tawh te an ni a. Tuna kawng an zawh chhan bak pawh hi sorkar hmalak mekna a la awm. Sorkar hmasa lama an chai tam loh, Aikal lak chungchangah te pawh zirlai pawlte an tawng chhuak ngam ta hi a lawmawm tak zet. Zirtirtute attendance check ngam sorkar a ding ta a, Kai App siam a ni bawk. Sikul zirtirtute pawh an kal that phah a, App a result a that vang a niang e, department zawng zawngah hman a ni ta hi a lawmawm hle a ni,” a ti a.
Dr. Vanlalthlana chuan, “MTET nei lo MR Teacher tam tak te pawh last chance pek mek an ni a, Samagra Shiksha hnuaia unqualified teacher awmte pawh zawn chhuah mek an ni. Dan laka sorkar himna turin uluk takin engkim zirchian a ni a, hemi nghak zo lo hian vawiinah kawng an zawh ta a, an duh angin a tih nghal vek theih loh a, sorkar chuan hma a la zel dawn tih erawh hria se ka duh hle. Hun inpe lova mi chaw bel ben buaksak hi sorkarin a duh loh avangin, dan zuiin sorkar chu a kal mai a ni. ZPM sorkar hnuah Advertisement tel lova hna lak a awm lo mai ni lovin, School leh College-ah unqualified teacher lak an la awm lo. Asst. Professor atan NET emaw, Ph.D nei lo dah ngheh nan file put up a awm tawh lo bawk. Sorkar hmasaah mit siai chunga zirtirtu lak ang chi leh induhsakna awm thin ang kha a thleng tawh lova, ZPM sorkarah chuan NET nei lote lak a ni dawn lo,” a ti.
Minister chuan, “Kum 2019-a lak, MR teacher 800 chuang zingah qualified lo mi 100 chuang an awm a, qualified tam tak an awm tawh avangin tunah hian sorkarin last chance a pe leh mek. Sorkar hmasa khan kum 2024 thleng an qualify ve theihna turin hun an pe a ni. Heti a nih chuan MR teacher thenkhat, lehkha zir mek ten an tuar nghal dawn. Kan zirlai pawlten sorkar hmasa hnuaia sawi awmzia nei lova an ngaih, Aikal leh Unqualified teacher chungchang an rawn au chhuahpui theih chhan chu, sorkarin huai taka hma a lak tak vang a ni. MZP leh MSU-te hian zirna hmasawnna tur leh kan ramin a thatpui theih nan theihtawpin hma an la thin a, a lawmawm takzet a, tha takin kan thawk ho zel turah kan ngai,” a ti bawk.
