Directorate of School Education, Samagra Shiksha Mizoram leh ZALEN tangkawp chuan career consultation event ‘Fenthlir 2025′ ni hnih awh tur chu vawiin khan Chanmari YMA Hall-ah Rev. Dr. K. Thanzauva, Education Consultant chuan a hawng.
Fenthir 2025-ah hian Rev Dr. K. Thanzauva chuan, “Directorate of School Education, Samagra Shiksha Mizoram leh ZALEN chanchinbu ten zirlai hma hun thlir pui a, hun a buatsaih sak chu lawmawm a tih thu sawiin, Mizo thalaite hi kan muthlu rei tawh a, i thangharh tawh ang u, zirlaite leh tunlai thalaiten hmasawn kan ngaih zia i hre thar ang u,” a ti.
ZALEN Chanchinbu Editor Vanlalrema Vantawl pawhin thusawiin, Fenthlir in a tum ber chu zirlai naupangte hma hun thlirpui a, khawvel tak ramah hian an hma hun atan, an zirlai atan, an eizawnna atan eng hi nge tha ang tih ngaihtuah tir a ni ber a ni a ti.
He hunah hian Career opportunity hrang hranga Mizo mithiamte panelist sawm bik hnen atangin thu sawi ngaihthlak a ni a, sikul 8 – Govt. KM Higher Secondary School, Govt. Mizo Higher Secondary School, Govt. MICE Higher Secondary School, Oikos Higher Secondary School, Govt. Republic Higher Secondary School, Mount Carmel Higher Secondary School, Greenland Higher Secondary School leh Synod Higher Secondary School -a Class XII zirlai te atangin zirlai 1800 vel an tel a ni.
Panelist ten zirlaite hi career awareness lama zirtirna an pek bakah hian Womens’ Polytechnic leh phai lam atangin Institution 4 – Bharat Vidyapeet University, Pune ; Jain University, Bangalore ; Royal Global University, Guwahati leh Badruka School of Management, Hyderabad te chu zirlaite dawr theih turin an inpho bawk a ni.
Fenthlir hi naktukah chhunzawm leh tur a ni ang a, school pasarih leh College 2 ten an chhim ve leh dawn a ni.
