AMC Ward XVI councillor Pi R.Lalawmpuii chuan vawiin khan a bial chhûnga zirna in pahnih, Govt.Central High School, College Veng leh Govt.Bethlehem Vengthlang P/S II-te chu tlawhin, heng zirna in pahnihah te hian sikulin an mamawh êm êm water cooler a pe a, zirtirtu leh zirlaite an lawm hle; Pi R.Lalawmpuii hian Govt.Bethlehem Vengthlang P/S II-ah parents teacher meet a hmanpui nghal bawk a ni.
Pi R.Lalawmpuii chuan parents teachers meet-a hmanpuinaah, zirnaah hian primary school chu a bulṭhut an nih avângin a pawimawh ber an nih thu uar taka sawiin, private sikul fee sâng tak takah indah ngai lova mipui tam zawkin sawrkâr sikul an pan duhna tur khawpa sawrkâr sikul thuam ṭhat chu a thil vei, mut mawh hnar mawha a lo neih ṭhin a nih thu a sawi chhuak a, chutiang tur chuan zirtirtute’n mawhphurhna sâng tak an neih thu leh, nu leh pa-te pawhin mawhphurhna pawimawh tak an neih thu a sawi a ni.
