MNF Party chuan thuchhuah siamin, “ZPM kaihhruai sawrkar hnuaiah Zirtirtu sawn kual avanga Mizoram kil tina harsatna awm leh khawtlangin buaina an tawh a tam ta hle mai hi MNF chuan pawi a tiin, chinfel sak ni thuai se a duh takzet a ni,” an ti.
Thuchhuahah chuan, “Zirtirtu indaihlohna hi a bik takin thingtlang lamah a nasa hle mai a. Khawpui lamah zirlai tlemte awmna ah zirtirtu indaih taka an awm laiin, indaihlohna hmun zirlai ngah tak tak thingtlang ami te chhuhsak an ni fo mai hi hriatthiam har tak a ni a. Tunhnaiah khaw tam takin indaihlo taka zirtirtu an neih mek te a hnawhkhahna siam sak ni si lovin, khawpuiah sawn luh an awm reng mai a. Heng avanga thingtlang lam mangangin an zirtirtu sawnchhuahte kal chhuah phallova, lungawilohna lantir thawm hmuhtur a awm zurzut mai hi Zirna lama kan sawrkarin thingtlang mite a ngaihthah zia lantirnaah MNF chuan ngai a. Zirthiamna mamawh em em thingtlang mipuite hmasawn tir kan sawrkar hian a duh loah a ngai bawk a ni.
“An sawrkar tantirh atangin buaina thawmin zoram a tuam tan a, chawl lovin tun thleng in, buainain Zoram hmuntin deuh thaw a luah a. A changtu Minister hian tihngaihna a hre tawk lo nge, chinfel tumna a nei duhlo tih hi MNF zawhna a ni.
“Nitin zirna dawn mamawh ve tho thingtlang zirlaite mamawhna chhang turin ZPM sawrkar chu a rang thei ang bera hma la turin kan phut a. Mipui hnena chhiah tam tak an khawn belh ur ur hmang hian Zirtirtu indaihlohna avanga harsatna awm teuh hi chingfel thuai turin kan phut takzet a ni.
“MNF sawrkar kalta in, khaw tamtak harsatna chhawk zangkhai tura vantlang sikul enkawl Sawrkarin a theih ang tawka a chhawk zangkhai sak, Upgrade tawhte tihtawp sak a, an harsatna ngaia an dintir lehte harsatna tawh mek pawh hi a rang thei ang bera an harsatna phuhrum tura chingfel nghal thuai turin kan phut bawk a ni,” an ti bawk.
