Zoram Medical College & Health Laboratory ah thawktu indaih lo tak chungin nitin hnathawh tur an nei tam chho reng a, chhun lama duty ten zan lamah tlawmngaiin an duty chhunzawm thin niin ZMCH Laboratory thawktute chuan an sawi.
Zoram Medical College & Hospital, Falkawn-a Technical Staff Welfare chuan Indian Confederation of Medical Laboratory Science (ICMLS) lo duan lawk angin, ni 17-23, July, 2025 chhung khan National Medical Laboratory Professional Week (NMLPW) an hmang a. Mipui vantlangin an chhawr tlan theih turin luanchhuahna an nei bawk a ni.
Dr. Zothansangi, HOD Pathology ZMC chuan, “Laoatory technician te chu hmuh theih loh leh hriat pui lem loha mipui tana hnathawktu an ni a. Hetiang week an hmang thei hi a lawmawm takzet a ni. Thawktu in an daih lova, hnathawh tur nitin a awm belh a. Chhun lama hnathawkten zan lamah emergency duty an chhunzawm nghal thin a. An chanvo ngei ngei chawlh pawh kan in pe hleithei lo. Staff zingah nupui pasal neiin, nau neite awm mahse, thawktu indaih lohna avangin chawlh in pek a harsa a, hetiang hunah pawh anmahni aia hnathawk thei tur inruat angai thin a ni,” a ti.
Dr.Zothansangi chuan, he hun an hman chhung hian paediatrics department tan naute bukna khawl 5 leh Nebulizer 5 an pe a. ZMC-a Damlo OPD inentirte tan a thlawna blood glucose level leh HbA1C test sakin nimin khan Voluntary Blood Donation Camp chu Beer Seba group nena huaihawt a ni a, mipa 36 leh hmeichhia 5 ten a thlawnin thisen an pe, a ti bawk.
Chanchinbu mite zawhna chhangin, tun dinhmunah ZMC Central Laboratory ah hian thawktu nghet 8 an awm bawk a, a bak dang Project atangin 10 an thawk bawk. Internship bei mek mi 20 an awm bawk a ni. Kum 2024 chhung khan damlo 61,413 hnen atangin test hrang hrang 2,25,740 neih a ni a. Kumin January atanga June thla thleng khan damlo 70249 hnen atangin test hrang hrang 318595 neih a ni tawh bawk a ni.
Kum kaltaa test zawng zawng aiin kumin kum chanve chhunga test hi a tam zawk a, damlo 8866 ah test 92855 in a tam zawk a ni. Nitin Routine bik a test theih zat chi 128 a ni a, Emergency bik a test theih awm zat chi 31 a ni thung a ni.
Hetih a nih mek lai hian tlawmngai pawl thenkhat atangin sample collection period chu ti rei tura nawrna an dawnga, tuna an kal dan dar 1:30 thlenga test tur an lakkhawm theih chin chu tlailam dar 3:00 thleng nawrna a awm a. Hetianga hna kalpui anih chuan mihring leh khawlin an zawh an rin loh thu an sawi bawk.
