Vawiin ni 27th May 2023(inrinni) hian Zo Reunification Organisation (ZORO) bultumin Aizawl Millenium Centre kawt atanga Aizawl Vanapa hall kawt thleng Zo Hnam inpumkhatna kawng zawh neih a ni a. He kawng zawh hi Zohmingthanga Zotea, President ZORO Thalai in a kaihruai a, Michael Lalramsanga, Vice President ZORO Thalai in hunserh a hmang a. Zo Hnam inpumkhatna duh tu kum upa lam leh Thalai thahnem takin Hnam inpumkhatna kawng zawh naah hian an kal a ni.
Kawng zawhna ah hian “Kan unau te tawrhna hi kan tawrhna a ni” tih te “Zofaten enge kan duh? Insuihkhawm” tih te in au rualna neih a ni.
Zohnam inpumkhatna kawng zawh kharna Vanapa hall kawt ah huntawi hman a ni a. He huna thusawitu L. Ramdinliana Renthlei, General Secretary ZORO chuan, “Zofate hi khawchhak atangin thlang kan tla a, thlangtla hmasa leh hnuhnung kan awm a, kan tawng leh nihphung te pawh lo danglam tawh mahse Zofate chu unau vek kan ni a, Pathian in a ruatsa, thisen a inzawm kan ni,” a ti a.
L. Ramdinliana Renthlei chuan, “Mizoram state chhunga Zofate hi kan lo felin, kan lo zaidam tawh ngawt mai. Kan unau ten Manipur tualchhung buai avangin an in leh lo an chan a, an nunna an chan bawk a heti chung hian Mizoram state chhunga Meitei awm te him dam takin an awm a, zalen takin an awm thei a ni. Vawiina ka sawi duh chu kan unau Manipur a awm ten harsatna an tawk zel a nih chuan Mizo thalai te dawh theihna in a tlin dawn lo a ni. Kan unau harsatna tawk mek te thlavang hauh tur hian kan pen chhuak dawn a ni,” a ti bawk.
L. Ramdinliana Renthlei, General Secretary ZORO kaihruaina in heng resolution te hi pawm a ni.
ZOFA INKHAWMPUI LIAN HNAM INPUMKHATNA KAWNG ZAWH 2023 RESOLUTION
1. Zofate; India, Burma leh Bangladesh awp chhunga chengte hi Hnam khat, thlahtu thuhmun, serh leh sang inkhawih pawlh, beiseina hrui khat vuana, ‘Dam leh tlang khatah, thih leh ruam khatah,’ ti thin unau dik tak kan ni.
2. Chin-Lushai Conference 1892, January 29, Calcutta, Fort William-a THUROLUM (Thutlûkna) No. 1-na angin rorelna pakhat hnuaiah Zofate insuihkhawm leh turin chak takin hma kan la tlang zel ang.
3. Ramri daidana leng Zofate’n kan lungkham ber Zofate insuihkhawm lehna hi kan pianpui chanvo a ni a, UNO-Declaration on the Rights of Indigenous Peoples, Article 3-na in min phalsak angin Zofate insuihkhawm leha rorelna pakhat hnuaia kan awm tur thu vawiin ni 27 May, 2023 hian kan puang a, hei hi a hlawhtlin theih nan tharum thawh lovin chak takin hma kan la zel ang.
4. Zofa hmun hrang hranga awmte kan insuihkhawm leh theih nan, kan awmna hmun apianga theihtawp kan chhuah zel dawn.
