Zoram Thar Zofate Lairelna Inpui buatsaih Zofa Lelte Inzaisiakna lawmman dawngtute: Pakhatna: Zenngaihsang, Churachandpur, Manipur; Pahnihna Angeli Lalruatpuii, Chhingchhip, Mizoram leh Pathumna Sonia Lamngaihchin, Dumlian, Manipur te chu an ram leh khaw mipuiten ropui takin an lo hmuak a, chawimawina pangparthi leh lawmna thil pek ṭhahnem tak an dawng. Zofa Lelte 2022 lawmman dawngtute hi Zoram Thar Zofate Lairelna Inpui hruaitute chuan an khuaah an kalpui vek a.
A lawmna program pawh an hmanpui vek a ni. Khawtlang, Kohhran leh NGO Pawl hrang hrang ten kokim takin an lo dawngsawng tha hle. Sawrkar lam mi pawimawh te pawhin lawmpuina thil pek hlu tak tak an hlan. Lawmawm Pahnihna dawngtu Chhingchhip nula Angeli Lalruatpuii chu a khawnawtin an lo hmuak a, Chhingchhip kawtthlerah ropui takin hun hman a ni. Kohhran leh NGO Pawl hrang hrang ten lawmpuina thu sawin thil pek hlu tak tak an hlan.
Lawmawm pakhatna Zenngaihsang leh Pathumna dawngtu Sonia Lamngaihchin te pawh Manipur a Zo hnahthlak ten Airport ah ropui takin an lo hmuak a. An School leh College kalna Rayburn High school leh College ah te program an lo siam sak. Khawtlang mipuiin Community Hall ah lawmna program an siam bakah in lamah ruai nen an lawm bawk. Manipur Zofa Lelte Organizing Committee te chuan Thanksgiving leh musical night Inkhawm Muolkoi Presbyterian Kohhran Biakin ah an buatsaih a. Manipur aṭanga Zofa Lelte contestant tling zawng zawngten zaia rawngbawlna hun an hmang.
