Zoram Thar Zofate Lairêlna Inpui chuan khawvel pum huap Zofate Hnama Harhna Intawhkhâwm (Zofate National Awakening Convention) a huaihawt dâwn a. A hmun ah Vanapa Hall, Aizawl; Ahun atan October 31 – November 1-2, 2024, ni 3 chhûng a ni ang.
Hemi chungchangah hian vawiin khan Zoram Thar Pawl chuan Aizawl Press Club ah Chanchinthar lakhawmtute kawmin, an hruaitupa Pu Zaichhawna Hlondo chuan, Zofate Hnama Harhna Intawhkhâwm thupui chu- I thovang u khai i din teh tak ang u’ tih a nih tur thu sawiin, “Hnama Harhna Intawhkhâwm hi a vawi khatna tur a ni dâwn a. Kan ramah Thlarau harhna vawi tam tak a thleng tawh ṭhin a. Mahse Hnama Harhna a la thleng ngailo. Kan hnam hming dik tak pawh kan hre lova, kan thlahtu bul pawh tunge a nih kan hrelo. Khawi aṭanga lo kal nge kan nih pawh kan chiang lova, Bo chikimin kan la bo rih a ni,” a ti.
Hnama Harhna Intawhkhâwm hi khawvêl pum Zo hnahthlâkte huap a ni dawn a, Mizoram Chief Minister pawh khuallian tura sawm a ni. Party hruaitute, hnam peng hrang hrang aiawh te, College Professor te, NGO hrang hrang hruaituten Hnama Harhna thupui siam hrang hrang te an sawi ang.
Intawh khâwmna Programme hi Tv leh Youtube ah live a pek chhuah a ni ang. Hnam lam thiam leh zaithiam ten lam leh zaiin an âwi bawk dâwn a ni. Rev Dr. Zaichhâwna Hlawndo chu Hnama Harhna thupui sawitu ber a ni daâwn a. Hnam ṭobul a lo chhui chhuah leh Pathianin a hriattir dan te a sawi dâwn a. Zofate mahni a ro in rel (independent) kan nih dan tur a dawnte pawh a sawi ang. A thusawi hi mipui hmuh theih turin a lem nena entirna big screen ah tarlan vek a ni ang. A thusawi aṭanga zawhna leh chhânna hun te hawn a ni ang.
He Intawkhâwmna ah hian a duh apiang a tel theih dâwn a. Vanapa Hall hi a zau lutuk loh avangin a kal turte hming ziah lawkna Whattsapp group siam a ni ang. Zoram Thar Zofate Lairêlna Inpui chuan he hun pawimawh taka lo tel turin Zofate zawng zawng an sawm a ni.
