ZORO General Headquarters, Aizawl chuan vawiin khan chanchinthar lakhawmtute kawmin, “Bangladesh-a kan unau Zohnahthlakte chuan an sahim nan leh anmahni puala state demand-in Kuki-Chin National Army (KNA) dinin an theih tawkin an bei a, an tribal puite lakah pawh dodalna nasa tak an tawh hnuah tun hnai mai khan Bangladesh Sorkar Army ten anmahnia an beih ngam loh avangin Arakan Army(AA) te nen inremna siamin, Bangladesh Army leh Arakan Army te tangrual chuan Kuki-Chin National Army (KNA) te chu Chaihkhiang khua leh a chhehvelah kapin nasa takin an inbei a, civilian pawi sawi lote pawh dim hauh lovin nunaute an nghaisa a, tunah hian Bangladesh-a kan zohnahthlak unaute chuan harsatna namenlo tawkin an khuaah pawh awm ngam lovin an tlandarh mek a ni. Bangladesh kan unau, kan thisen zawmpui ten nasa taka harsatna an tawk tih ZORO in a hriatin pawi a ti hle a, kan tawrhpui takzet a ni. He thil thleng avang hian Chaihkhiang khaw mi civilian pawi sawilo mi 9 lai Arakan Army (AA) ten an man a, Bangladesh Army hnenah an hlan rin a ni.
“Hetiang hi thil awmdan a nih avangin Bangladesh-a kan Zohnahthlak unaute hi dinhmun derthawng takah an ding mek a, mi tam tak an khuaa an awm ngam tawh loh avangin Mizoramah pawh lo raltlan mai thei dinhmuna an ding a ni. ZORO chuan Mizoram sorkar chu heng kan unau Bangladesh a awm Zohnahthlak te harsatna hi a theih ang anga ngaihtuah a, hma la turin kan ngen a, kan NGO pui pawl hrang hrang te pawh bengchhi a, a theihna apianga lo tanpui turin kan ngen a ni. Mizoram mipuite pawh kan unau Bangladesh a mi ten harsatna an tawk tih hria a, tawngtaipui turin kan in sawm nghal a ni,” an ti.
“ZO-Reunification Organisation(ZORO) chu khawvel hmun hrang hranga awm Zofate kan insuihkhawm a, lungrual tak leh rorelna pakhat hnuaia kan awm theih nana hma la tu pawl leh Zofate tana ding a nih angin kan unau, kan thisen zawmpui Bangladesh a mite harsatna tawh mek hi kan enzui reng dawn a, puih an ngaihna apiang ah pui turin hma kan la zel dawn a ni,” an ti bawk.
