Manipur kan unaute thlavang hauhna leh tawrhpuihna punkhawm buatsaih a ni dawn e. ZORO chuan Zofa tawh phawt chu tel turin an sawm.
Vawiin 7th July 2023 (Zirtawpni) chhun dar 12:00 khan ZO-Reunification Organisation (ZORO) chuan executive committee meeting an nei a, he hunah hian Manipur tualchhung buai avanga kan chipui kan unaute harsatna tawh mek chungchang sawi a ni.
Manipur-a Zofate tih chimih leh nuaibo tumna kal mek chuan thla hnih a lo pel ta a, he hmalakna tenawm tak hian kian zai a la rel lo a ni. ZORO chuan Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur rorelna laka la hrang tura India sorkar an ngen mek hi a thlawp a ni tih hi kan puang nawn leh a ni. Khawvel hmun hrang hranga Zofate hian tuna Manipur state hnuaia Zofaten kan ram humhim tura an beihna hi an thlawp reng dawn tih hi ZORO chuan a chiang a ni. Zofate hi kan tanrual chuan engkim kan ti thei a, kan ti dawn bawk a ni.
ZORO Executive committee meeting chuan Manipur tualchhung buaina avanga kan unau ten nunna an chan a, an in leh lo an chan bawk a, chenna leh ei leh in tur tlachham thahnem tak an awm hi na kan ti a, kan tawrhpui takzet a ni. Manipur kan unaute tawrhna kan tuarpui zia leh nunna chan te kan sun a ni tih lantir tha kan ti a. Ni 12, July 2023(Nilaini) chhun dar 12:00-ah Vanapa Hall kawt-ah punkhawm buatsaih tum a ni. Hemi ni hian kan unau dim lo taka nghaisatu Manipur Chief Minister Biren Singh lim hal tur a ni a, India Prime Minister Narendra Modi chu Manipur buai chungchang ah engmah a sawi ngam loh avangin a lim hal tur a ni. Tin, kan unaupa Zo Tlangval David Thiek rawng taka that tu Mairembam Romesh Mangang lim hal tur a ni bawk. Pathian tanpuina dilin tawngtairualna hun hman a ni ang.
Manipur tualchhung buai avanga kan unaute tawrhpuina leh nunna chan te sunna ZORO in a buatsaih ah hian Zofa khawvel hmun hrang hrang a awmte a tam thei ang ber rawn tel turin an sawm a ni.
