Vawiin May 22, 2023 Thawhtanni hian Mizo Hnam Runah chhung Inkhawmna neih a ni a, hun hnihnaah Zodinpuia Vice President MNYF chuan thusawiin, Mizoram chu Pathian in Zofate Jerusalem ni tura a din a ni a. Zohnahthlak rorelna pakhat hnuaia kan awm leh theihnan hnama min dintu chuan kawng min ruahmansak mêk a. Zofate’n zalenna famkim kan neih hma loh chuan MNF chu Mizo mipuite min hruai tura Pathian min pek a ni, a ti.
Zodinpuia chuan, India ramah hian party hrang hrang kan awm khawm a, hmalak dan pawh a in ang lo hlawm hle a, atha ber tur MNF chuan mipui tan angaihtuah a, Mizoram political party hrang hrang zingah MNF aia hruaitu nei tha kan awm lo a, Congress, ZPM leh BJP hotu lu te chu hun rei tak MNF-a lo awm tawh, nihna leh chanvo thlâkhlelh avanga political party hrang hranga awm kual tawhte an ni a, an party awmna ah theuh MNF hmalak tawh chu hmuh thelh luiin a chhe ber ang mai in kan hotulu te an mawhpuha, hei hi mipui rilru a nilo zawng a hruaikawi theihna a nih avangin ching tam tawh lo se a duhthu a sawi a ni.
MNYF Vice President chuan, Mizoramah hian party thenkhatin inchirh thehnan kohhran/khawtlangah inlungrualna tichhe thei zawng a thusawi an awm zeuh zeuh thin chu a pawi a tih thu a sawiin, hei hian thalaiah hnam chungchang thlenga nghawng theih thil te a nih avangin thudik ziktluak lo sawi tawh lo turin ka duh a ni, a ti.
Thusawitu dang L. Ramdinliana Renthlei General Secretary, ZORO leh EX MZP President ni bawk chuan thusawiin, ZORO hmalak tawhna leh ZORO kalphung bakah ZORO inkhawmpui buatsaih leh a ni dawn a, mipuite tel vek turin a sawm a. ZORO hi political party a ni lova, Zofa zawng zawng chu ZORO ah hian an leng vek a ni. Polotics hi chi hrang hrangin a thliar theih anga ZORO chu hnam politics keng tute kan ni. Khawvel a awm Zofate rorelna pakhat nei a kan awm theih nana hmalatu a ni a, Zofate kan insuihkhawm a, lungrual taka kan awm theihnan theihtawp chhuah a hma a la thin a ni, a ti.
L. Ramdinliana Renthlei chuan, Manipur buainaah MNF in che tha hle a. MNF party hi Mizo Nationalism kengtu tak tak chu in lo ni, a ti a. Politics tih hi a awmzia takah chuan mimal emaw pawl emaw khua leh tui thatna tura inkaihhruaina, mitinin dik taka an chanvo theuh an chan theihna tura rorelna, dan leh thu pek, hnam leh hnam chi leh chi inkara inunauna tha thlen tura thawhna hmun te, hnam ziarang humhalh te, ramri khamfel leh mipui vantlang thatna tura rorelna tih te hi a huam vek a ni, a ti bawk.
Zofate hi khawchhak lam atangin thlang kan tla a, thlangtla hmasa leh thlangtla hnuhnungte kan awm a. Zofate hian tawng hrang hrang hmangin, chi peng hrang hrang awm mah ila unau vek kan ni. Kan tawng te, kan awmna hmun te in ang lo mahse unau kan nih a dang chuang lo. ZORO chuan Zofate inkhawmpui lian buatsaih kan tum a, buatsaih kan tum chhan chu Zofate hi kan duhthu vang ni hauh lovin thendarhin kan awm a. India, Burma leh Bangladesh ah te kan awm a ni. Chin-Lushai Conference chu 1892 khan Kolkata Forth William-ah neih a ni a, kha rorel ah khan Zofate hi hnam khat an ni si a, then darh a awm chu tha an ti bik lo a ni ang, an thurel No. 1 ah chuan “Chin-Lushai conference a member te chuan chin lushai member pumpui chu a theih anga rangin rorelna pakhat hnuaiah dah ni rawh se” tiin an lo rel tawh a. Chin Lushai conference in a lo rel tawh tun thlenga tih puitlin tak lo chu ti puitling tura ngaihtuah ho turin Zofate inkhawmpui lian hi buatsaih tum kan ni a ti.
Hnam Run chhung inkhawm hi Lalawmpuia Chhangte Adviser, MNF General Headquarters chuan a kaihruaia, H. Dokhuma Adviser, MNSF Hqrs chuan hunserh a hmang a, Jonathan Lalduhzuala leh MNYF Saron veng unit atangin zai ngaihnawm tak ngaihthlak a ni bawk.
