PC.Party chuan thuchhuah siamin, “Bangladesh ram buai avanga kan unau Zohnahthlak ràltlànte manganna au aw in Mizoram sawrkar ngèng a chhun tlang zawh loh avanga ramri a duty BSF te an inlulin phahna leh chimawm taka kan unaute chunga an chetna tudaih a nih theih nàna Central YMA ten lungawi lohna lantir tuma ruahmanna an siam ta hial mai hian Pu Zoramthanga kaihhruai MNF sawrkar rintlak lohzia a tilang chiang hleah PC Party chuan kan ngai,” an ti.
Thuchhuahah chuan, “Heti khawpa Zohnahthlak unaute’n buaina leh harsatna namen lo an tawh lai leh nunna chàn khawp hiala an tawrh tawh laia an sahimna tura an kawng dàltute thian fai thei lo khawpa sawrkar chak lo leh thiltithei lo kan hrawn reng mai hi PC Party chuan a kham awm kan ti tawh takzet a.Chief Minister huaisen leh thiltithei Brig.T.Sailoa’n sawrkar laipui beisei kher loa ramria duty BSF te a control vek theih laia Vawiina Kan CM Pu Zoramthanga’n engemaw harsatna hleka Central a ti thlazen hi chu PC Party chuan a rual awh thlak kan tiin, tuna kan unau manganga khawsa mek te chhanchhuak vat tur hian CM a nihna hi tun hun atan hian a ni dawn lawm ni? tih hi kan beiseina a ni,” an ti bawk.
