MP (LS) C.Lalrosanga chuan vawiin khan Union Home Minister Amit Shah chu a pisa ah hmu in an inkawm a, Union Home Minister chuan C.Lalrosanga hnenah hian Aizawl atanga Zokhawsanga Assam Rifles an insawnfel vek tur thu a lo hrilh.
C.Lalrosanga chuan Amit Shah chu Assam Rifles an insawn chhuah dawn avanga a lawmthu hrilhin, hemi chungchangah hian amah Amit Shah leh Central sawrkar hruaitu dangte pawh vawi engmawzat alo nawr tawh thute a sawi a, C.Lalosanga chuan sawrkar laipui laka an thil ngiat tihhlawhtlin a nih dawn takah hian Chief Minister Pu Zoramthanga pawh a lawm hle a ni tih Union Home Minister chu a hrilh a. Assam Rifles hi hun bituk chhunga insawnfel vek tura an duh thu a sawi chu chhangin Amit Shah chuan an insawn ngei ang a ti.
Union Home Minister chuan project engemawzat hawng tura Aizawl hi a tlawh tur thusawiin, Assam Rifles battalion headquarters a hawn bakah Pu Laldenga Cultural Centre lungphum pawh a phum tur thu a sawi bawk a ni.
Hemi hma hian C.Lalrosanga hi India President, Droupadi Murmu-i’n MP tanglaite tana Rashtrapati Bhavan a tukthuan, breakfast a buatsaihah a tel ve a. He hunah hian Prime Minister Narendra Modi bakah Central Sawrkar Minister-te leh Parliament In hnih a member-te an tel a ni.
