Nizan khan Mizoram State Aids Control Society leh CYMA thawhhonaa buatsaih Zoram harh rawh campaign hnam zai leh lam intihsiakna chu Central YMA Hall Tuikhuahtlang ah Aizawl Bawrhsap Dr Lalhriatzuali Ralte in a hawng.
He hawnna puala inkhawm ah hian Dr Lalhriatzuali Ralte chuan thu sawiin, Mizorama AIDS natna lo hluar zel do nan a zoram harh rawh tia hlado chham a ngai ta mai chu pawi a tihzia a sawi a, India ramah AIDS punna rate tla hniam zawnga a kal laiin Mizoramah erawh a pung chho zel a ni a ti a, hei hi mi tamtak mak tih a tling hial a ni, a ti.
Bawrhsap chuan zoram harh rawh tiha Zoram tih hian min huam vek tih hriat a pawimawh a ni, a ti a. AIDS chungchang ah awareness pawimawhzia sawiin AIDS chu inchiu thin leh nawhchizuar te natna chauh a ni lo a, mi tupawh fimkhur tawk loh vangin an kai thei a ni, a ti. HIV do na kawngah kan hmuh dan leh do dan kan thlak a pawimawhzia thu sawiin kalkhawm te chu intihsiak tur ringawta kal ni lovin he campaign bul tantu ni turin a sawm. YMA members te hnenah chuan HIV do na kawnga sawrkar hmalakna thlawp tuin a ngen a, AIDS vei te en hranna leh inthinhrikna paihbo a, anmahni tanpuitu kan nih zawk a pawimawh thu a sawi.
He hawnna inkhawm hi Prof.Malsawmliana , Assistant Secretary CYMA chuan a kaihruai a, Dr R Zonunmawii District Program Manager ,DAPCU Aizawl chuan report pein, kum 2020 HIV estimation-ah chuan HIV Adult Prevalence Puitling (Kum 14-49yrs) te zingah India ram chu 0.22% a nih laiin Mizoram chu sang berin za zela 2.37% a ni. Aizawl district ah chuan za zela 3.99% te hi HIV hrik paia ngaih kan ni thung a ti. Mipat hmeichhiatna atanga inkaichhawng an tam ber thu a sawi bawk.
Zoram Harh rawh Campaign hi MSACS leh Central YMA tangkawp a AIDS do nana buatsaih a ni a. Mizoram hmun hrang hrangah awareness program neih niin hnam zai leh lam intihsiakna hun hman a ni bawk. District hrang hrangah intihsiakna hi Final neih tawh niin,District hrang hranga lawmman latu te- Lunglei chanmari Branch ,Champhai Kahrawt Branch, Kolasib Dawr veng Branch, Serchhhip Hualtu Branch, Mamit Reiek Branch, Hnahthial Chanmari Branch, Saitual Bazar Branch, Khawzawl Dinthar Branch leh Aizawl Vaivakawn Branch ten December ni khatah State Level intihsiakna Final an nei ang.
