Zoram hi ram tha lehzual zawka siam kan tum : Lalduhoma, ZPM

Tuichang bial fanga fehchhuak mek ZPM Leader Lalduhoma chuan vawiin khan Chalrang leh New Chalrangah vantlang inkhawm a nei a, khawtlang mipuiten an hlut hle a ni
Pu Duha chuan, “ZPM hian tihhlawhtlin duh kan nei a, chu chu Kalphung Thar Mipui Sawrkar siama Zoram hi ram tha lehzual zawka siam kan tum a ni. Chumi avang chuan hah pawh sawi lovin theihtawpin kan bei a ni,” a ti. “Ram ropui America-ah chuan President nihna hi term hnih (kum riat) bak a theih loh a, chumi chhûng chuan a tih tur te ti zo hman tura ngaih a ni. Chutiang a nih laiin kan ram politics-ah chuan mi pakhatin rei tak min kaihruai a; PC party term khat leh a chanve vel an lal a, President Rule-ah kan awm zeuh tih loh chu Congress leh MNF sawrkarna hnuaiah kum 50 kan awm ta char char a ni. Chuvangin kan ko hi thlak a hun tawh a ni tih hi mipui mimir te ngaihtuahnaah a lian tawh hle a ni,” a ti.
Pu Duha chuan, “Tunah hian party hrang hrangte dinhmun hi thlir ila; Congress chu UP leh Punjab inthlana an chetchhiat thu te, Mizorama pawh an dinhmun kan hria a, party ropui tak ni thin mah se tun dinhmunah chuan an hun a liam ve ta niin a lang a. MNF hi rorel lai an ni a, mahse an hruaitute dik loh avangin an tlu chhe mek a ni; an rorelna hnuaiah ram a dam lo a, mipui pawh kan dam lo. Sum leh paiah harsatna nasa tak kan tawk a, Health Care-ah mi 23,197 te bill cheng vbc 59 leh nuai 55 a tang mek a. Kum upa / tar pension pawh pek theih lohin a tang mek a ni. Hetiang a nih lai hian kan hruaituten bank 33 atangin loan an puk a, tun atanga kum 15-ah te rulh zawh tur a ni. He sawrkar hian a hnu lehzela sawrkar tur tan leiba phurrit tak a hnutchhiah mek a ni. Chung loan an lakkhawm hmang chuan restricted tender hmangin an duhsak zawngte contract an inpe a, heng mipui sum hmanga hnathawhte hi a chhe em em a, a then phei chu hnathawh a chhiat lutuk avang leh mipui tana a hlauhawm avangin vuak thiah ngai hial khawpin a awm a ni,” a ti bawk.
ZPM Leader chuan, “MNF hi an hruaitute chet dan avang hian an rilru a na em em a ni tih kan hria a, hetiang hi ni mah se rorellai party an nih avangin kum 2023 inthlanah pawh candidate tha tak tak an rawn nei leh ngeiin a rinawm. Amaherawhchu, candidate tha tak tak rawn nei leh mah se an hruaitute avâng hian mipuiin an hnawl a rinawm tawh a ni,” a ti bawk.
He hunah hian AMC Councillor Baryl Vanneihsangi pawhin thu sawiin, “Kan ramin a mamawh chu Pathian hretu politician a ni a, mal min sawmtu duh danin rawng kan bawl tur a ni,”a ti a. “ZPM hi mipui ta a ni a, mipui sawrkar siam kan tum avangin mi zawng zawng kan leng a ni. Principle nghet nei ila, thudik zawng ila, Pathian malsawm tlakin hna i thawk ang u,” a ti bawk.
ZPM Leader hi General Headquarters hruaitu engemawzatin an zui a, an kalna apiangah mipui lawm an hlawhin, leh Tuichang bial chhunga ZPM hruaitu ten lo dawngsawngin, hun hlimawm tak an hmang thei zel a ni.