Nimin ni June ni 16, 2023 (Zirtawpni) tlai Dar 3:00 khan Lal Thanhawla Auditorium ah Aizawl District Congress Committee (ADCC) buatsaihin Organisers’ Political Training neih a ni a. He hun hi Hmingthanthuama Dy.Chief Organiser in a kaihruai a. MPCC Treasurer Dr. Lalmalsawma Nghaka, MPCC Spokesperson Dr. Lallianchhunga leh ADCC President Lalhmingthanga Pachuau ten thu a sawi.
He huna thusawitu, MPCC Treasurer Dr. Lalmalsawma Nghaka chuan, Congress Party chu a thawh kan mek thu sawiin, Zoram mipuiin Congress Party ah an rinna an nghat mek a. Party dang chhungkaw buaina avangin Congress Party-ah mi tam tak an lo lut khawm mek a. Buhseng tur a tam a, a sengtu tur lam hi kan indaih lo chho ṭan mek a. Chuvangin, Congress Party tana theihtawp chhuah turin kalkhawmte a fuih a ni.
MPCC Treasurer Dr. Malsawma chuan Congress Party hian kan tih loh tur Policy kan duang ngai lova. Congress Party in kan ti ang kan tih chu kan tihlawhtling ṭhin. Party ṭhenkhatten ‘kan sorkar a nih chuan Loan kan pe chhuak anga, sorkar chu quarantor ah aṭang ang’ tih an sawi ṭhin. Sorkar hi khawi ramah mah quarantor-ah a ṭang ngai lova. Congress Party kan sorkar a nih chuan PACS kal tlangin kuthnathawktute hi loan kan pe chhuak dawn a ni. Ramin hma a sawn theihna tur chuan sorkar ṭha kan mamawh a, sorkar ṭha nei tur chuan kalphung (system) ṭha angai a. Chu system ṭha tak mai ‘Ṭhat Loh Theih Lohna Bawm’ chu MPCC President Pu Lalsawta hian a duang chhuak tawh. Congress Party in kan huat ber chu mahni inhaivur a, sorkar sum eiruk hi a ni a. Pathian leh mipui zara Congress Party in sorkarna kan chang a nih chuan eirukna lakah kan fihlim ang, a ti.
Dr. Lallianchhunga, MPCC Spokesperson chuan ṬANG PUIHNA chungchang sawiin, mi taima leh thawkrimte din chhuah tir hi ‘TANG PUIHNA’ in a tum ber a ni a. Pathian leh mipuite zarah ‘SORKAR THA’ din kan tum a, chu ‘SORKAR THA’ chu din chhuah ngei tuma tan la mek te emaw tan lak tum te tan a ding zel ang. Kawng tin renga din chhuah tuma ‘Tan latute’ chu sorkarin Rs.2,00,000 (nuai hnih) emaw a aia tam pawhin, an mamawhna zawn zelah puih an ni ang. ‘TANG PUIHNA’ cheng nuai 2 hi SEM POLICY a ni lova, a mamawh tak tak te chauh tanpui an ni ang. Congress party in ‘kan ti ang’ kan tih chu Pathian leh mipui zarah kan lo tihhlawhtlin tawh thin avangin sorkarna kan siam a nih chuan chhungkaw tin, mimal tinin nasa takin hma kan sawn dawn a ni. Sum enkawl thiam ram hruaitu hnuaiah chuan TANG PUIHNA hi tihhlawhtlin theih ngei a ni. ṬANG PUIHNA hmangin kuthnathawktute hi kan puih bakah, an thar chhuahte hralh chhuahna tur leh sawngbawlna tur kan ngaihtuah dawn a ni, a ti.
He huna thusawitu dang ADCC President Pu Lalhmingthanga Pachuau chuan, Congress party hi party inkaihhruaina nei mumal ber kan ni a. Kan elpui ten ‘in tho chhuak tawh lovang’ an tih pawhin Pathian zarah kan organization inrelbawl dan tha avangin kan tho chhuak leh mai thin, a ti bawk.
ADCC Organisers’ Political Training hi ADCC Deputy Chief Organiser Hmingthanthuama’n kaihruaiin, C.Vanlalngheta, Organising Secretary in hunserh a hmang a. Nl.Jenet Zaneihkimi Khiangte in kalkhawm te zaiin a awi a, Lalliansanga, Deputy Chief Organiser in lawmthu a sawi bawk.
