Zoram mipuiin kan Manifesto an ngaihven em em nachhan chu Congress chuan kan ti ang kan tih hi kan ti lo ngai lo : Zodintluanga

Khawzawl Zaingen Branch YMA Hall-a MPCC ‘Khawchhak Tlangdung Fan’ Programme neihnaah MPCC Treasurer Zodintluanga Ralte, MLA pawhin thu sawiin, “He ram siamtha tur hian kan kal zel dawn a ni. Election Manifesto kar kal ta mai khan kan tlangzarh ta a, Zoram mipuiin an ngaihven em em nachhan chu Congress chuan kan ti ang kan tih hi kan ti lo ngai lo,” a ti.
“Vawiinah chuan tang puihna kan rawn zuar a, NLUP lo hlawhtling tawh te, la hlawhtling lote leh mahnia a ngaihna hre lo tan kan rawn pui dawn a ni. Mi harsa zawkte lei rem an rawn rah ve nan kan rawn pui dawn a, tan nachang hre lote pawh kan chhawmdawl dawn,” Zodintluanga chuan a ti a.
Congress Manifesto Number One an tlangzarh tak chungchang sawiin, “Thalai lehkha thiam tak takte, sorkar hna an thawh loh avanga thawh nei lote an thiam zawng hmangin kan chhawmdawl dawn, mi vanduai bikte tan ruahmanna kan siam dawn. SEDP dawn beisei dawng ve ta lo te, SEDP vanga beidawng zawkte kan Manifesto hian a huam a ni,” a ti.
“Zoram mipui hian Congress party-ah rinna an nghat leh mek. Congress party a chet tawh chuan thlipui, ruahpui leh kawng chhia hian a dal dawn lo,” CLP Leader chuan a ti bawk. “Party pui ber eng vangin nge kan nih kan tih chuan, term 5 sorkar thei hi party te kan ni thei lo. MNF in mi rethei te te hnathawk te a ban a, mipui ei ai an ei a, kan budget-ah mipui a tel loa chu chuan Congress hi min kaitho a ni,” a ti.
“Kan ram hi siamthat a ngai leh tawh, he ram siamtha tur chuan Pu Lalsawta chuan That Loh Theih Lohna bawm kan siam dawn a ti. Party dang hian an lo nuih thin a, a nuihtute hi an Party president hetiang siam ve ngam hi an awm lo. Diknain kan ram kan kaihruai ang ti ngam awmchhun chu Pu Lalsawta a ni,” Zodintluanga chuan a ti.
Central atangin kum tin pawisa lo kal hi a tam tual tual a, mahse kan ram a rethei tual tual a, “Sum enkawl an thiam lo a, mipui thleng phak budget an siam lo a. Kamrula te Mazumdar-a bak an thleng lo. Mipui thleng phak budget siam leh turin Pu Lalsawta chauh hi a awm a, sum a ngai a, sum enkawl dan kan thiam a ngai,” a ti.
“Kan sorkar hunah chuan Minister zinga eiru an awm chuan Pu Lalsawta chuan ka ban ang, a ti a, chutiang ti ngam chu an awm ve lo. MNF chu an hotupa berin a zir tawh loh avangin an Minister leh MLA te an inthlahrung tawh lo a ni,” Zodintluanga chuan a ti.““”Kan ram hi a na a, mi retheite eizawnna tur kan nei lo, sorkar hnathawk ten a hun takah hlawh an la thei lo. Hei hi siamtha turin sum enkawl thiam, a ngaihna hria an awm a ngaia chutiang CM tur chu kan nei bik a ni,” MPCC Treasurer chuan a ti.
Medical College tha tak kan sorkar laia kan lo fin tawh pawh enkawl thiam lo MNF sorkar hi mipuiin an ring ngam tawh lo a ni, Zodintluanga chuan a ti a. “Nimin maia Saituala Congress mipui an hlima an lawm em em nachhan kha Congress in sorkar tha kan siam dawn tih an hriat vang a ni,” a ti.