Mizoram Pradesh Youth Congress Committee chuan thuchhuah siamin, “Pathian kaihhruaina leh awmpuina a zarah kum 2022 kum tawp kan lo thleng dawn hnai ta a, Mizoram Pradesh Youth Congress Committee chuan kumin chhunga kan chetvelna zawng zawngah Pathian awmpuina kan chan avangin lawmthu kan sawi a, ram leh hnam tana kan hmalaknaa min tawiawmtu mipuite chungah thinlung takin lawmthu kan sawi bawk a ni.
“MPYCC chuan kan phak ang tawk zelin Sawrkar tha kan neih theih nan hma kan la thin a. Kan hmalaknate thahnemngai taka min puanzarsaktu thuthar thehdarhtute chungah kan lawm tak meuh meuh a, kan hma lam hunah pawh min tawiawm chhunzawm zel turin kan ngen takzet bawk a ni.
“Kumin chhunga kan chetvelnaah leh kan hmalaknaah MPYCC ten mi pawi kan sawi leh tih a lo awm palh anih chuan mipuite ngaihdamna kan dil a, kan tih zawng zawngte kha mipuite hmasawnna tura ti kan ni tih min hriatsak theuh kan duh takzet a ni.
“Krismas leh Kumthar hlim taka hmang turin Zoram mipuite duhsakna kan hlan a, Krismas leh Kumthar chibai kan buk vek a che u.
“Congress Thalai member zawng zawngte pawh kan awmna hmun theuhah midangte tana malsawmna thlentu ni turin kan in chah nghal bawk e,” tiin an tarlang.
