Zoramin cyclone siper dawngin, chhiatna liantham erawh a thleng lo

Cyclone siper dawngin Mizoramah thli leh ruah a thawk a, hmun thenkhatah thil tihchhiat nei mah se, hriat theih chinah chhiatna liantham erawh a thleng lo.
Bay of Bengal chhimchhak lama cyclone insiam, Cyclone ‘Si-trang’ tia vuah chu hmarchhak state thenkhatin a dawng ve a, Mizoram pawh a siper dawng thei tur zinga ngaih tel a nih avangin sawrkar chuan chhiatna thleng palh theihah mipui fimkhur tur leh inralring turin hriattirna a lo chhuah lawk tawh a ni.
Thawhtanni zan atang khan Mizoram hmun thenkhatah he cyclone siper hi a thawk a, Siaha district, Lunglei district leh Aizawl district hmun thenkhat chu a dawng na zual deuha ngaih an ni. Hemi avang hian Thawhlehni zing khan District Disaster Management Authority Aizawl chairman, bawrhsap chuan zirna in – nursery atanga pawl 12 inkar luhna school chu venthawn thilah dan tlawhchhanin chawlh a puang a, hemi hnu hian Lunglei leh Serchhip DDMA chairman-te pawhin school chawlh hi an puang zui a ni.
Hriat theih chinah October 24 zana thli thawk hian Lunglei district-a Laisawral Sub Centre chu a chung leh a bang a chhem chhia a, an khuaah hian chhiatna lian dang erawh a thleng lo nia thu dawn a ni. Lunglei district-ah vek hian Serkawnah in pakhat chu an inchung bula plastic tuizem, tui dahkhah chu tlu in, hei hian in a delhchhia a, thi leh hliam an awm lo.
Siaha district-a No-aohtla khuaah Myanmar atanga raltlante awmna camp pahnih a chhia a; New Siaha West-ah chenna in pakhat tichhia in, Siahatla-a in, Assam type pakhat chung a la a; Tipa RD Block huamchhunga awm Khopai khuaah in pakhat a tichhe bawk.
Mamit district-a Tuidam leh Kawrtethawveng khuaah thli leh ruah avangin luah zui tlak lohin chenna in pakhat ve ve a tichhia a; Mamit Luangpawl Vengah Aizawl panna kawngpui chu thingtluin a dang a, thi leh hliam an awmlo.