Vawiin khan ZORO chuan an president R.Sangkawia hovin Aizawl Press Club-ah Press Conference an nei a, “India sorkar laipui chuan Zofa ram hrang hranga chengte zalen taka kan in tlawh pawh theihna Free Movement Regime chu thiatin ramri kan turte reng reng tan Border Pass neih ngei a tul leh Border Pass neilo tan ramri kan a theih lohna dan chu January 1, 2025 atangin a keng kawh tan ta a. Human Rights Council leh UN Permanent Forum on Indigenous Issue-ah kan thlen nghal a ni,” a ti.
ZORO chuan, “India Sorkar laipui chuan ramri-a inkal pawhna tur Entry/Exit points 18 ruatin chung zinga 2 chu Pilot sites atan leh Phase I-ah hmun 3, Phase II-ah hmun13 a ruat fel a. Ramri kan theihna tur chhuanlam atan- unaute tlawh., khualzin (tourism)., sumdawnna, infiamna, official duty, medical treatment, Border Trade Affairs, Attending seminars, meetings or conferences leh Cultural Exchanges programmes te an ni tih a tarlang a. Border Pass nei thei tura a tarlante chu ramri atanga km 10 huam chhunga mi chauh an niin Border Pass dam hun chhung tur pawh ni 7 chhung a bituk nghal a, heng Pass te hi ni 7 ral hmain mahni lakna hmunah thehluh leh ngei tur a ni bawk.
“Border Pass dil tu chu ramri atanga km 10 chhunga mi a ni ngei tur a ni a, a ni tih Proof-na (Proof of identity) Police Post atangin emaw, a chenna khaw hotute hnen atangin a neih ngei a ngai bawk. Thil mak tak chu Border Pass pe thei tur chu Civil Officer/ Magistrate ni awm tak a ni nain pe theitu tura ruat (designated Officer) Assam Rifle-in a pe chhuak dawn a ni.
“India sorkar laipuiin UN-DRIP kalh zawnga hma a la hi ZORO chuan pawi a ti tak meuh a, Zofate zalen taka kan inkal pawh theihna Free Movement Regime a titawp hi tinung leh ngei tur leh ramri kân tura Border Pass neih ngai tura thupek a siam hi hnuk kir leh ngei turin Zo Re-unification Organisation(ZORO) chuan India sorkar laipui a ngen a. Hemi chungchang hi ZORO chuan atul angin a ngaihtuah zel dawn a, na taka dodal turin ruahmanna a la siam dawn a ni,” an ti bawk.
