Manipur-a Zofate an chenna ram laksak tumna, Zofate tih chimih leh nuaibo tumna kal mek chuan thla hnih leh ni 8 a lo awh ta a, he hmalakna tenawm tak hian kian zai rel lovin zual lam a pan zel a ni. Zo Reunification Organization (ZORO) chuan heng te hi mipui hriatah kan sawi nawn leh duh a ni, tiin vawiin khan an hmalak tumdan Aizawl Press Club-ah an sawi.
ZoRO chuan Ni 12, July 2023 (Nilaini) chhun dar 12:00 a Vanapa Hall kawta mi hrang hrang Lim an hal tumah pawh Police ten ngen mahse, Pime Minister Narendra Modi Lim chu hal tel ve an tum tih an sawi a. “Manipur tualchhung buai in tanni, ni 3, May 2023 atang khan Zofate leh Meitei te hi kan inthen fel thlap tawh a ni. Rilruah kan inpawh lo mai ní lovin kan inhlat tial tial a, engkimah ramri a inkham fel ta a ni. Zofate leh Meitei te hi inremna kawng hawi turin hmalak ngaihna a awm tawh lo a ní. Hei hian Zofate leh Meitei te ram inrelbawlna pakhat hnuaia dahkhawm reng tum chu thil theih a ni lo tih a ti chiang hle a ni.
“Meitei Chief Minister Biren Signh leh a thawhpui Minister leh Party lama míte, tin, Meitei khawtlang hruaitute thusawi atanga kan hriat chu Zofate leh Meitei te hi inrema chenho an duh lo va; a chhe thei ang ber a puhin an ram va chuhpuitu leh dan lo va pem lut tia dawta puhin nuai chimih an tum chhunzawl zel a ní. Manipur Sorkar, Police leh Civil lam ni se Meitei thuhnuaiah vek an awm a, anni lahin inthup lovin Zofate chu nasa takin min bei mawlh mawlh a ni. Manípur state chhungah dan mumal a awm lo va, thil nihphung a buai vek a, hmun hrang hrang atangin India Sorkar hian thuneihna la mai se tia rawtna a awm reng chungin Chief Minister Biren Signh kaihhruai Sorkar chu a la ding nghet tlat a, Meitei mipui pawhin an thlawp tlat a ni. Hei hi Zofate tan chuan Meitei nena rorelna intawm a beidawnthlakzia a tilang chiang hle a ni.
“ZORO chuan Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur rorelna laka la hrang tura India Sorkar an ngen mek hi a thlawp a ni tih hi kan puang nawn leh a ní.
“Kan unau Manipur state chhung a awm ten nunna an chan a, in leh lo halsak an ni a, ei leh in tur an nei lova, chenna nei lo thahnem tak an awm bawk a ni. ZORO chuan na kan ti a, kan tawrhpuiin, nunna chan te kan sun takzet a ni. Manipur tualchhung buaina avanga kan unaute tawrhna kan tawrhpui zia te, nunna chan te kan sunna lantir tha kan ti a. Ni 12, July 2023 (Nilaini) chhun dar 12:00 hian Vanapa Hall kawt-ah thlavang hauhna, tawrhpuina leh sunna hun hmanga punkhawm kan buatsaih dawn a ni. He hun min rawn hmanpui tur hian Zofa zawng zawngte thinlung takin kan sawm e,” an ti.
Tun dinhmunah Manipur buaina avang hian
Mitthi – 124 +
Hliam damdawiina awm – 377
Missing – 60+
Khaw hal – 290
In hal – 7247
Biak In leh Quarter Hal – 357
Raltlan – 41,425
ITLF Relief Camp, Lamka – 110 te an awm tawh a ni.
