Vawiin ni 7, March 2024 khan ZORO General Headquarters chuan ZORO office-ah Executive meeting an nei a, meeting-ah hian Free Movement Regime (FMR) leh Border fencing chungchang sawiho a niin, Bangladesh kan unaute tan Damdawi thahnem tak hlan nghal a ni.
ZORO chuan Free Movement Regime (FMR) India Sorkar in hlih a tum leh India Sorkarin Burma leh India inrina hung (fencing) a tum chu tha a ti lo a, a tul dan ang zel a dodal nise a ti. Mizoram State Legislative Assembly session neih mekah “Central Sorkar-in Free Movement Regime (FMR) tih tawp a tum leh Myanmar nena kan inrina, Border fencing kalpui a tum hi tha kan ti lo va. Ti lo turin kan ngen a ni. Dik lo tak taka Bristish Sorkar in Divide and Rule Policy hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se” tih resolution an pass hi lawmawm kan ti hle a, resolution pu lut tu ZPM Sorkar a Home Minister Pu K. Sapdanga ZORO chuan a fakin, a chhuang takzet a ni.
Vawiin ZORO meeting-ah hian Bangladesh kan unaute tan Damdawi thahnem tak hlan a ni a, a sum zawng chuan cheng nuai chuang man a ni. ZORO in Bangladesh kan unaute Damdawi a pek hi ZORO Adviser Pu C. Chawngkunga tu leh faten an thawh khawm a ni a, Pu C. Chawngkunga te chhungkaw chungah ZORO chuan lawmthu a sawi a ni. Tin, Bangladesh kan unaute hi Thuthlung thar Bible pali hlan nghal an ni bawk.
