Manipur-a Zofate an chenate tih chimih leh nuaibo tumna kal mek duhlohna lantirnan vawiin khan Zo Reunification Organization (ZORO) chuan Transport Deptt. kawtah hun an hmang a.
ZoRO chuan, “Manipur tualchhung buai in tanni, ni 3, May 2023 atang khan Zofate leh Meitei te hi kan inthen fel thlap tawh a ni. Rilruah kan inpawh lo mai ní lovin kan inhlat tial tial a, engkimah ramri a inkham fel ta a ni. Zofate leh Meitei te hi inremna kawng hawi turin hmalak ngaihna a awm tawh lo a ní. Hei hian Zofate leh Meitei te ram inrelbawlna pakhat hnuaia dahkhawm reng tum chu thil theih a ni lo tih a ti chiang hle a ni,” an ti a.
“Kan unau Manipur state chhung a awm ten nunna an chan a, in leh lo halsak an ni a, ei leh in tur an nei lova, chenna nei lo thahnem tak an awm bawk a ni. ZORO chuan na kan ti a, kan tawrhpuiin, nunna chan te kan sun takzet a ni,” an ti bawk.
Vawiina ZORO pungkhawm chuan hetiang hian resolution an siam :
1. Manipur tualchhung buaina avanga kan unau ten nunna an chan a, an in leh lo an chan bawk a, chenna leh ei leh in tur tlachham thahnem tak an awm hi na kan ti a, kan tawrhpui takzet a ni. Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur state rorelna laka la hrang tura India Sorkar an ngen mek hi kan thlawp a ni tih hi kan puang e.
2. India Sorkar hian Manipur state a awm Zofate hi rorelna hran pe rawh se.
3. Khawvel hmun hrang hranga awm Zofate kan insuihkawm a, lungrual taka kan awm a, rorelna pakhat hnuaia kan awm theih nan hma kan la zel dawn a ni.
