Zothan Autoworks Pro Volleyball League inkhel hmasa berah championship hnuhnung ber final-a insu Chhinga Veng Spikers leh Durtlang North, hmeichhe lamah Durtlang leh Bungkawn an intawng dawn.
Vawiinah Hawla Indoor Stadium Coference Room-ah Mizoram Volleyball Association (MVA) President Er H Lalzirliana, MLA chuan handbook leh fixture a tlangzarh a, Covid-19 leng vanga kum hnih thulh zawn a nih hnua Pro Volleyball khelh a ni leh tur chu thil lawmawm a ni, a ti.
May 6, zirtawpni zanah R Dengthuama Indoor Stadium, Mualpuiah Pro Volleyball vawi ngana tan a ni dawn a, dar 8 atangin Chhinga Veng leh Durtlang North an inkhel ang.
2019 final-ah Durtlang North-in set hmasa pahnih an lak hnuin harsatna an tawk a, Spikers-in pawtthlakin a tawpah 3-2-in an chak a, a vawi khat nan an champion. Kum thum chhunga Pro Volleyball inkhel awm leh hmasa berah Durtlang North-in an tlawmna chhang let nghal an tum dawn a ni.
May 7, inrinni zanah vawi khat aia tam champion thei awm chhun Hunthar leh Tuichangral an inkhel dawn a, May 9, thawhtanni zanah team panga an inlan kim ang a, TNT-in champion lai Chhinga Veng an hmachhawn ang.
May 10, thawhlehniah hmeichhe league tan a ni dawn a, team tel pali inlan kim nghal vekin 2019 final-a intawng Durtlang leh Bungkawnin tlai dar 3 atangin an khel dawn a, zan dar 8-ah Bethlehem Vengthlang leh Kanan an inkhel ve leh ang.
Kum thum kal ta khan rin hlawh zawk ni chungin a vawrtawpah Bungkawn an tlawm a, an khelh leh hmasak berah tawrhna thawi dam theihna hun tha an nei a’ chutih rualin Durtlang tan title humhim turin fiahna pawimawh a ni nghal ang.
MVA President Pu Zira chuan, kum nga chhungin Mizoram volleyball-in India aiawh thei player neih ngei a la tum fan a, Pro Volleyball-in a hlawhtlin theihna kawng a hawn ngei a beisei.
“Covid-19 leng vangin hun khirh takin MVA a tlakbuak a, kan tum ang a hlawhtling mai thei rih lo. Mahse, tun hnai maiah hlawhtling takin Hnahthialah Inter District Volleyball Championship buatsaih a ni a, tunah Mizorama inelna sang ber khelh a ni leh dawn a, hma kan la chhunzawm zel dawn a ni,” a ti.
R Dengthuama Indoor Stadium-ah vek khelh a ni dawn a, May 27-ah final tur niin inkhel vawi 20 (mipa tum 13 leh hmeichhia vawi sarih) a awm dawn a, LPS Vision-in live telecast-in a pe chhuak vek dawn a ni.
——
ZOTHAN AUTOWORKS PRO VOLLEYBALL LEAGUE 2022
May 6-27, 2022 @ R Dengthuama Indoor Stadium, Mualpui, Aizawl
MIPA (team 5)
Chhinga Veng Spikers (2019 champion, champion lai)
Durtlang North (2019 pahnihna)
Hunthar (2017 leh 2018 champion)
Tuichangral (2019 semifinal lut)
Thutak Nunpuitu Team (2016 pahnihna)
* 2016-ah Pro Volleyball League tan a ni a, kum li a zawna neih a nih hnuah Covid-19 leng vangin kum hnih thulh zawn a ni. Tun tumah hian champion hmasa ber Anastasia Electric Veng an tel dawn lo a ni.
HMEICHHIA (team 4)
Durtlang (2019 champion, champion lai)
Bungkawn (2019 pahnihna)
Bethlehem Vengthlang
Kanan
* Pro Volleyball League-ah hmeichhe inelna vawi hnih buatsaih a ni tawh a, 2017 khan Power Department Sporting Club-in final-ah Electric Veng hnehin champion hmasa ber an ni. 2019 final-ah Durtlangin league-a chak vek leh rin hlawh Bungkawn an hneh.
FIXTURE
LEAGUE :
May 06, zirtawpni – 8pm : Chhinga Veng Spikers v Durtlang North (mipa)
May 07, inrinni – 8pm : Hunthar v Tuichangral (mipa)
May 09, thawhtanni – 8m : Chhinga Veng Spikers v TNT (mipa)
May 10, thawhlehni – 3pm : Durtlang v Bungkawn (hmeichhia)
8pm : Bethlehem Vengthlang v Kanan (hmeichhia)
May 11, nilaini – 8pm : Durtlang North v Hunthar (mipa)
May 12, ningani – 8pm : Tuichangral v TNT (mipa)
May 13, zirtawpni – 3pm : Durtlang v Bethlehem Vengthlang (hmeichhia)
8pm : Bungkawn v Kanan (hmeichhia)
May 16, thawhtanni – 8pm : Chhinga Veng Spikers v Hunthar (mipa)
May 17, thawhlehni – 8pm : Durtlang North v Tuichangral (mipa)
May 18, nilaini – 8pm : Durtlang v Kanan (hmeichhia)
May 19, ningani – 8pm : Hunthar v TNT (mipa)
May 20, zirtawpni – 8pm : Chhinga Veng Spikers v Tuichangral (mipa)
May 21, inrinni – 8pm : Durtlang North v TNT (mipa)
May 23, thawhtanni – 8pm : Bungkawn v Bethlehem Vengthlang (hmeichhia)
SEMIFINAL – MIPA :
May 24, thawhlehni – 8pm : League 1st Position v League 4th Position
May 25, nilaini – 8pm : League 2nd Position v League 3rd Position
FINAL – HMEICHHIA :
May 26, ningani – 8pm : League 1st Position v League 2nd Position
FINAL – MIPA :
May 27, zirtawpni – 8pm : League 1st/4th postion v League 2nd/3rd Position
