@ R Dengṭhuama Indoor Stadium, Mualpui
RESULT – May 24, thawhlehni zan :
Thutak Nunpuitu Team def Hunthar (mipa)
– 25-20, 20-25, 11-25, 25-19, 15-13 (3-2)
D3 Business Player of the Night
– Laldensanga (Hunthar)
Amrit Premium Plus Cement Fan of the Night
– Joela (TNT)
* Thutak Nunpuitu Team-in mipui leh an bitum barakhaihin set thum set hnihin champion tura tlang rin Hunthar an hneh a, 2016 hnua a vawi khatna leh a ṭum hnih nan Pro Volleyball final an lut. Mizo hlanga khel Muanna Veng team tan Vanlalṭanchhana (Valbuanga) chuan point 25 hmuin 10 hloh a, a chak tur chin felna hnuhnung set nganaah 13-13 a nih laiin point hlu tak a thawk chhuak a, a hnuah F Lalhriatpuia’n net bulah Hunthar spiker Laldensanga vuak dang thlain hnehna hlu tak an chang a, an inkhelh chhung zawnga team au phurtu kawr var ha rual mipui pung khawm nen hlim em emin hnehna an lawm.
* Ni nga kal ta khan Hunthar nen league-ah insuin set khat mah la lovin chiang em emin TNT an tlawm a, championship kal meka vawi nga an khelhah an chak vawi hnihna chauh ni mah se trophy an chuh dawn a, semifinal hnuhnung zawka inkhel tur Tuichangral leh Durtlang North nen zirtawpni zanah final an khel ang.
* League-a sang ber ni chunga semifinal khel Huntharin bul an ṭan fuh lo va, TNT-in net bulah ṭha takin Gagan Kumar-a ball vuak an dang a, harsatna an tawk. Set hloh lova khelh thum an chak zawn hnua set an hloh hmasak ber thleng mah se insiam ṭhain set hnih an thunun zawn a, Densanga, Lalramnunfela leh Zomuansanga bakah Gagan-a’n awmzia a nei thar ve leh a, hneh takin set thumna an awpbet.
* Mahse, set lina aṭangin Lalrinzuala Hnamte chuan TNT fuih phurin kawng dikah an kir leh a, Huntharin vuak thlak harsat thar lehin an talbuai a, an insiam thar zui mai thei lo. TNT-in an ṭanhmun sawhnghetin Valbuanga’n langsar taka a khelh bakah hun pawimawhah captain Vanlalchhantluanga Sailo leh Zosangzuala an rin tlak tel a, championship kal meka hneh theih loh ang maia chungnung hman Hunthar hneh hmasa ber an ni a, an mamawh fiahna hautak pal tlangin rahbi pawimawh tak an tuk.
* Vawi khat aia tam champion thei awm chhun Huntharin engti zawng pawhin rin an hlawh zawk na a, a ṭum thum nan champion an tumna a hlawhchham. Densanga’n point 21 hmuin vawi li a tisual a, D3 Business Player of the Night lawmman dawng mah se team tan a hlu zo lo. Championship kal meka an khelh ṭum nganaah a vawi khat nan an tlawm a, Pro Volleyball hnuhnung ber 2019 ang bawkin semifinal pal tlang zo lovin
hrilhhai takin an tla a, la champion ngai lo an champion dawn tih a chiang nghal a ni.
Player stats :
TNT
Vanlalṭanchhana : point hmuh 25, point hloh 10
Zosangzuala : point hmuh 13, point hloh 2
Lalrinzuala Hnamte : point hmuh 10, point hloh 1
Vanlalchhantluanga Sailo : point hmuh 8, point hloh 4
Sadraka Fanai : point hmuh 4, point hloh 1
F Lalhriatpuia : point hmuh 4, point hloh 2
HUNTHAR
Gagan Kumar : point hmuh 25, point hloh 15
Laldensanga : point hmuh 21, point hloh 4
Lalramnunfela : point hmuh 8, point hloh 3
Zomuansanga : point hmuh 10, point hloh 6
Lalnunfela : point hmuh 7, point hloh 1
Vanlalthlengropuia : point hmuh 2, point hloh 0
FIXTURE :
SEMIFINAL – MIPA :
May 25, nilaini –
8pm : Tuichangral v Durtlang North
FINAL – HMEICHHIA :
May 26, ningani –
8pm : Bungkawn v Bethlehem Vengthlang (hmeichhia)
FINAL – MIPA :
May 27, zirtawpni –
8pm : TNT v Tuichangral/Durtlang North
