Vawiin khan Champhai Vengthar Community Hall-ah ZPM Champhai South Block conference neih a ni a; Pu Lalduhoma, Leader; K Sapdanga, Working President leh ZPM General Headquarters atangin hruaitu ṭhenkhatten an hmanpui a, Champhai South Block huamchhung atangin K Sapdanga, Working President-in mi 430 lawm takin ZPM ah a lawmlut a ni.
ZPM Working President chuan, “Kan leader an beih dan hrang hrangte kan sawi seng lo; MLA atanga ban a nihna chhan kha a ZPM lutuk tih hi a ni a, keini erawh chuan kan Leader a ZPM lutuk hi kan lawm em em zawk a ni. Serchhip by-election kan han hmachhawn a, pawl dang zawng zawngte vote hmuh belhkhawm aia tam kan Leader hovin kan hmu kha a ni a, hei hi kan chhuang a ni lova, thudik kan sawi mai a ni. Tunah hian Pu Duha pawl, Pu Sapa pawl tiin nasa takin min bei a, ZPM-ah Pu Duha pawl hi lian takin a awm a, chutah chuan keipawh hi member ka ni ve a ni. Chuvangin, Pu Duha pawl tih leh Pu Sapa pawl tih anga min beitute hi i ngaidam ang u. Kan Leader hi ZPM Chief Ministerial candidate atan kan pawm a, a pawm lotu chu ZPM-ah an leng lo a ni. Pathian leh mipui zarah chakna kan chang a nih chuan kan Leader hi kan Chief Minister tur a ni a, MLA atan pawh amah thawhpui thei chi kan dah ang a, thlawp thei lo leh amah mil lo tan chuan candidate nih pawh a rem dawn lo a, minister atan pawh amah thawhpui thei lo tan chuan hmun a awm dawn lo a ni,” a ti a. “Keini ZPM hi mi ralthuam ang apiang lek ve thei kan ni lo a, pawl dang dawt hmanga beih te hi kan tih ve a thiang lo a, kan thahruite hi lei lama mi ni lovin van lama mi a ni tih i hre reng ang u,” a ti bawk.
K Sapdanga, ZPM Working President chuan ZPM nihphung sawiin, “ZPM hi pawl la naupang takni mah ila, ZPM-ah a kul ataia ṭangte hi kum rei tak tawnhriat tam tak nei tawhte kan ni a, chuvangin kan hlim tlang a, kan lawm tlang a ni. Tunah party lian tia han chhal zingah chuan a naupang ber kan ni a, chuti chunga vawiin thleng a member thar kan nei zel hi a lawmawm hle a ni. ZPM hi kum 2017-ah a lo piang a, kalphung thar din tura he pawl hi din a ni a. Pawl hrang hrangah pawh ZNP leh MPC te inphahhniam theihna azarah he pawl hi mumal takin a ding thei a, a tak taka min kaihruaitu chu ZNP leh MPC te an ni. Pawl thenkhat chuan hruaitu nihna kan inchuh dawn emaw an ti a, keini erawh chuan kan inhnawn a ni. Kan pawl inrelbawl danah hian mi thenkhatten min sawisel an tum thin a, Val upa Council kan nei te hi keini chu kan lawmin kan thatpui takzet a ni. Sawrkar inrelbawlnaah an inrawlh dawn lo a, anmahni leh an chhungte pawhin sawrkar zar an zo ve dawn lo a ni,” a ti.
Lalduhoma chuan thu sawiin, “Kalphung thar hi eng nge a nih tiin min zawt thin a; kalphung hrim hrim hi a awm a, amaherawhchu a system a fuh loh chuan a mumal thin lo a ni. Kan party chuan system thar kan hmang dawn a, kan party inrelbawl dan hrim hrim pawh hi a danglam a, collective leadership-in kan kal a ni. Tunge thu ber tiin min sawiselna an zawng thin a, keini erawh chu committee thuin kan kal a ni. Working President kan nei te hi kan thatpuiin kan tangkai pui em em a. Kan pawl inawp danah hian tumah kan rawn lova, ṭha kan tiha angin kan kal mai a ni,” a ti.
Kan ram sum leh pai dinhmun sawiin, “Tunah hian kan sawrkar hian leiba a ngah em em a, ZPM-in sawrkarna kan chan chuan sum renchem chungchangah hma kan la dawn a; sawrkar suma MLA car lei hi kan titawp dawn a, MLA te hamthatna hi a zahveah kan ti tlem dawn a ni,” a ti. “Kan ram siamtha tûrin Kohhran ten aw an chhuah nasa em em a, Kohhran hian zirna siamthat leh hriselna chungchangah pawh hma a la nasa a, hei hi thil lawmawm tak a ni. Keini party pawhin kan ram politics-ah Pathian ram lo thleng rawh se’ tiin kan au a ni,” a ti a. “ZPM chu party dang lakah kan danglam ngam tur a ni; kan awm danah fimkhur ila, kan awmdan hi chunglam malsawm tlak ni se la, mipui beisei kan ni tih hriain kan nundan pawh i fimkhur ang u,” a ti bawk.
