Aizawl 13th July, 2023: ZPM-in Bial Viltu atana a ruatte chuan L&B Resort-ah ni 11.7.2023 khan Intuai tharna hun an hmang. 2023 MLA inthlan lo awm turah Pathian leh mipui zara thlan tlin an nih chuan, hreprukna lakah fihlim MLA (corruption free legislator) ni turin ban pharin an intiam.
ZPM bial viltute intuai tharna inkhawm chhawng hnih hi Vice President Rev. Dr K Thanzauva leh Dr Kenneth Chawngliana ten an kaihruai a, sawihona hi CM candidate Lalduhoma leh GS i/c Policy Dr KC Lalmalsawmzauva ten an kaihruai.
Bial viltute hian ruat an nih tan April thla leh tun inkara an bial vil chhunga hmasawnna leh harsatna an tawhte an sawiho a, an zirho nghal bawk. ZPM thil tum an aupui mek zingah Bana Kaih Policy chu thalaite’n an tuipui thu te, thlai thar hralhna rate siam chu lo neitute’n an tuipui thu te, kalphung thar mipui sorkar chu mi tinin an nghahhlelh tawh thute an sawi uar hle. Long term policy zingah kawlphethaa intodelh thuai tura mipui beiseina a san thu an sawi uar hle bawk.
A thlawna sem policy chu mipuiten an hnawl tawh avangin vote thlak dawnah pawh sum semin awmzia a neih an rin loh thu bial viltute chuan an sawi a, mipuite khawngaih vote dawng turin tih tak zeta inngaihtlawm a pawimawh tih an inzirtir.
June 6, 2023 khan ZPM bial viltute hian Saitualah intuai tharna hun hi an lo hmang tawh bawk a ni.
