Vawiin June 3, 2022 (Zirtawpni) hian Tourist Lodge, Chaltlangah ZPM Campaign Strategy Development Workshop, ZPM Planning Department buatsaihin neih a ni a. He hun hi Pu K. Sapdanga, Working President-in a kaihruai a, Rev. Darchungnunga, VUC member-in hunserh a hmang a, Pu Lalliansawta, President chuan Key note Address a sawi bawk.
ZPM President chuan, “Ram rorelna tha zawk siam turin ZPM a inbuatsaih mek a, mipuite rintlak Sorkar siam tur chuan taihmakna, thuawihna leh rinawmna hi innghahna atan kan hman tlat a ngai a, kan thil tum pasarih – Sawrkar kalphung thar, mipui sawrkar siam, Ram hnam leh sakhaw himna tura beih, Rorelna dik a awm theihna tura thawh, Sawrkar leh party-ah a huhoa rorelna (collective leadership) lantir, Zofate rorelna pakhat hnuaia dah tura beih, Zonunmawi chawi nung zel tura theihtawp chhuah, Ram rorelnaa Pathian ram tundin te hi a bul atanga a tawp thleng hian kan Party innghahna leh kan tlangaupui tur a ni tih i theihnghilh lo ang u. ZPM hi a din tirh atangin Kohhran hruaitu leh rawngbawltu zahawm tak tak te nena din a ni a, a din tirha phur leh tha tho taka min tawiawmtute duhdan leh rilru kal pel daiha khawsak hi a hlauhawm hle a, he ram siamtha tura mipui min beiseina tibeidawngtu ni lo turin i inbuaisaih zel ang u. Kan tawngkam, kan chetzia leh kan rilru sukthlek reng reng mi dang tana rimtui a ni tur a ni a, ram siamthat hna thawk tur hian rilru zau tak, inhawng tak pu turin kan inchah a ni. Mahni inngai ropui hman kan ni lo a, tlawm tak, dik tak, ram leh hnam tana mahni ral zel ngam nun nei turin ZPM mi leh sa zawng leh vawiin kan hruaitu rual lo kal khawm zawng zawng te thinlung takin ka sawm che u a ni,” a ti a, “Thuawihna, Taihmakna nen he pawl hi kan kalpui chho zel ang. Kan ram hruaitu thenkhatte hi chu ram changkangah awm se an inhmeh ang. Kan ram erawh chu nasa taka hmasawn ngai kan ni thung, kan hmabak kawng a la thui, tihtur kan ngah hle a ni,” a ti bawk.
President in keynote address a sawi hnu hian, Planning Department kaihhruainain kum 2023-a mipuiin min beisei ang ngeia sawrkarna ZPM in a siam ngei theihna tur leh party hmasawnna tur hrang hrang sawihona neihzui a ni a. He hun hi Pu B. Lalchhanzova, General Secretary in a kaihhruai a ni.
