Aizawl April 29 : Thla thar May ni 5, 2022-a MADC inthlan lo awm tura ZPM tana campaign beihpui thlak mek Pu Lalduhoma, ZPM Leader chuan khaw hrang hrang a fangkual mek a, nizan khan Khopai-ah vantlang inkhawm neiin, vawiin khan Laki, Theiri, Ahmypi a tlawh leh bawk. Heng a tlawh khuaah te hian vantlang inkhawm nei zelin, ZPM zawm thar mi thar duhawm tak tak a lawmlut a ni.
Pu Duha chuan, “Mizoram mipui zaa sawm ruk (60%) vel hi Agriculture & Allied sector-a innghat kan ni a. ZPM chuan kuthnathawktute hmasawnna hi ngaihpawimawh ber (top priority)-ah a nei dawn a. Hnam zahawm kan nih theihna turin ei leh bara kan intodelh ngei theih nan hma kan la dawn a ni. Tuna kan sawrkar lai budget siam kan en chuan kuthnathawktute tan engtih tham mah a awm lova, hei hian a entir chu, kan sawrkar hian kuthnathawktute a ngaipawimawh tawk lo hle tihna a ni,”a ti. “MADC huamchhungah hian kuthnathawktute tana hmunhma tha tak tak a awm a, heng hmunhma hman tangkai loh a awm te hi ZPM kan sawrkar chuan Zoram eibel tling thei khawpa cheibawl kan tum dawn a ni,” a ti.
Pu Duha chuan, “ZPM chuan MADC inthlan hi kan ngaipawimawh hle a. Kan hruaitu dangte chu sawi loh, Siaha District hi kuminah ringawt pawh kan Working President Pu K. Sapdanga’n tum thum, keiin tum hnih kan tlawh tawh a, kan theih chin chin kan hrut a ni. He biala Zoram eibel ni tura theihna tam tak awm hi Mipui Sawrkar hmanga haichhuak turin tanrualpuiah ka sawm che u a, tun inthlan atang hian bul i tan ang u,”a ti.
ZPM Leader hi Siaha District ZPM hruaitu bakah General Headquarters atangin mi engemawzatin an tawiawm a, ZPM MADC Campaign Committee Chairman Pu TBC Lalvenchhunga pawhin thusawina hun a hmang bawk a ni.
