“Kum 2023, December ni 8 a sawrkar thar lakluh a nih aṭangin ram hruaituten mahni inhaivurna leh nawmchenna ringawt an buaipui a, Mizoram in sawrkar kan neih tawh zawng zawng ah ZPM sawrkar hi thla 9 chhung a mipui fairel bel rawk nasa ber leh sawrkar hnathawk vau nasa ber an la ni,” Zodinpuia, MNF Gen.Hqrs. GS chuan a ti.
He thu hi ni 28.9.2024, (zirtawpni) a Mizo Hnam Run inkhawm ah Pu Zodinpuia chuan sawiin, ZPM sorkar-in mipui sum a an party mi leh sa an vulh nasat avangin petrol leh diesel man nasa takin a san phah a, hei hi mirethei ten kan tuar mek a ni. Buhfai man pawh za ah za (100%) a an tihsan dawn avangin card var hmang chhungkaw 111840 te chu mangang takin an awm mek a, mipui rawngbawl saktu nih in hre lo, sumdawng company emaw inti tlat sawrkar hnuaiah mipuite an rum mek a ni, a ti.
MNF General Secretary Zodinpuia chuan, ZPM chu party bil sorkar diktak a ni a, mipui sum hmanga an party hotute in tuamhlawmna pawh kum 1 chhungin ₹ 2518,00,000/- (nuaih sanghnih zanga sawm pariat) chuang a ni tawh tih sawiin, heti chung hian mipuite chu kawngchhe kar ah, chhiah tam tak chawi turin min hnutchhiah tawp mai a ni, a ti.
Chief Minister Pu Lalduhoma chu a Cabinet Minister zinga a ngaihtheihloh deuh te Department chan nasa taka a sawisel thin ah puh in, hmanni lawkah Pu K.Sapdanga chan Home Department nasa takin a sawisel a, tunhnai ah Pu Vanlalhlana enkawl PWD Engineer te chu contractor te nen a ruk a inthurual a, nasa taka eiru a ngaihtheih turin a puh leh a ni, a ti a. Tun sorkar tluk Mizoram sawrkar hnathawkten vauna an tawh nasat hi a la awm lovang a ti bawk.
Pu Zodinpuia chuan ZPM chu an intiamna ang ngei a kal tura a beisei thu sawiin, mipui in an intiamna hmangin an x-ray mek a ni, a ti a. Tar pension thlakhat ah cheng 1000/- a tihsan a nih tur thu an sawi pawh vawiin thlengin an sawinawn kan la hre lo a, kuthnathawktu te 7th Pay pek leh crop insurance an sawihmuh pawh tihhlawhtlin a la nilo tih sawiin, loneitute thlai thar cheng 1 man pawh an leisak kan hriat hma in kuthnathawktute society member a inziaklut tura an tihna ah cheng 100/- laksak hmasak an ni a. Loneitute sum an laksak tlingkhawm hi cheng 4558500/- zet a ni tawh a ti bawk.
Sawrkar hi a intiam ang a a awm loh avangin kum 2023 ah kuthnathawktu te Hmunphiah nasa takin a chhiat phah tawh a, sawhthing pawh hi kum 5 liamta chhung khan Mizoram khawtin ah kg 1 cheng 100 aia tlawm a hralh an awm mang tawh lo. Maite leh Tualte khua phei chuan kg 1 cheng 127 leh cheng 110 te in an hralh a ni. Kuthnathawktute thlai thar man hi a rawn tla hniam viau a, kumin ah hian sawhthing kg 1 cheng 70 aia a hniam a nih chuan a mawhphurtu chu sawrkar a ni ang, a ti bawk.
Pu Zodinpuia chuan MNF chu Mizo Nationalism chawinung tu leh Mizo hnam dah pawimawh hmasa a kal thin a nih avangin neitu bik kan awm lova, Mizo zawng zawngte ta a ni, a ti bawk.
