Vawiin khan ZPM chuan Party Office-ah chhung inkhawm hun an hmang a, he huna thusawitu Pu B. Lalchhanzova PAC member chuan, “ZPM hi tobul mumal tak neia indin chho, ram chhung leh pawna Zoram thatna veitute sualchhuah leh tawngtai chhuah a ni a, kan kal dan hi party dang tan hman thiam ve chi a ni lo. Inchhitral ngamna atang lo chuan hman ngam chi a ni lova, keini chuan kan hmang ngam a, kan hmangaih Zoram tan ram mipui zawng zawng i thawk ho ang u,” a ti.
Pu B. Lalchhanzova chuan, “August ni 15, 2017-ah ZPM din a ni a, kum sarihna hmel a lo hmu ve ta. Kum 2018-ah khan party pawh la ni hman lovin inthlan kan hmachhawn a, MLA bial 8 ah mipui ten chakna min pe a, Zoram mipuiten ZPM chu party-a in register a nih leh nih loh lam an ngaihtuah lo. Constituency pariatah hnehna min chantir tawp mai a ni. ZPM hminga MLA tling te chuan ram tan hma an han la chho tan ta a, assembly house chhung atangte a ram siamthat hna an aupui thawm kha ruling party te tan tawrh a hrehawm viau a ni ang, kan hotupa Pu Lalduhoma chu an thuneihna hmangin an ban ta tawp mai a; Chumai ni lovin kan MLA dangte pawh an vau pah reng bawk a ni. A thlang tlingtu mipuite rilru a na em em a, chak leh zualah ZPM siamin inthlan that buatsaihah hnehna sang em em maiin mipuiten an thlang tling leh ta a ni. Kawng hrang hrangin ZPM kal lai tih buai tumin ruling party ten min bei a, kan tumah kan chian em avang leh kan hnung leh hmaa awm mipuiten min tawiawm that em avangin kumin 2023 MLA inthlan hmachhawn thei turin mumal taka candidate ni thei tur, rel fel thei hmasa ber party kan lo ni ta hial a ni,” a ti.
Pu Chhanzova chuan, “Kum 2018 inthlanah khan bial tam zawkah ding tur kan inhmu zo meuh lo a, tlawmngaih chhuaha ding kan ni fur mai! Beiseina nen ram tan kan penchhuak a, vawiin thlengin Pathian kaihruaina kan dawng nasa takzet a ni. He party hi tobul mumal tak neia indin chho, Zoram chhung leh pawna Zoram thatna veitute sualchhuah leh an tawngtai chhuah a ni. A danglam em emna chu a indin chhohnaah neitu leh dintu nia inngai kan tam em em a, Zoram pawna Mizote pawhin an vei chhuah niin an hria a, ram vei tawngtai mite pawhin an tawngtai chhuah niin an hria a, ram chhunga thil tha duh langsar lem lova intelkhawm thinte pawhin an besei ruk pawl ding taah an ngai bawk. A tobul atang rengin mipui te ta, neitu ngah anih avangin Movement Party tia hriat kan lo ni chho ta zel a, July ni 3, 2019 khan Election Commission of India chuan India dan hnuaiah party nihna min pe ta bawk a ni. Congress party leh MNF-ten kum 37 zet an inlalchhawk tawhna ram kan ni a, an thiam ang tawkin hna an thawk tawh a, an thlen theih chin pawh kan hmu fiah tawh viau a, thiam thil thar sawr chhuah tur an nei tawh rih lo a ni,” a ti.
