Vawiin hian Pu Zoramthanga, MNF President chuan Mizoram chhim lam a fan chu chhunzawmin, Lawngtlai Mizo Hnam Run leh Siaha Mizo Hnam Run a tlawh a. Thusawina hun a hmang ve ve a ni.
Pu Zoramthanga chuan thusawiin, “Mizoramah Political Party 30 aṭanga 40 inkar a piang tawh a. Tam tak an ral tawh a. PC an ral, Congress lah an chak lo telh telh a. Tunah chuan a Party lian pahnih chu MNF leh ZPM kan awm ta a ni. Indo, underground politics leh thil hrang hrang MNF hian a paltlang nasa lutuk. Chuti chung chuan MNF chu Mizorama party ruhrel lian ber kan la ni mek. Sorkar leh tura mipui beisei kan ni leh mek a. Hei hi a chhan chu Pathian leh kan ram tan, tih thuthlunga kan din tlat vang a ni,” a ti a. “Kum 64-a upa MNF hi Pathian leh kan ram tan, tia Pathian hming kan lam tlatna hi kan felnaah Pathianin min ruat sak a ni,” a ti.
MNF President chuan,”Mizoram leh a mipuite Pathian chanchinṭha hril darh tura buatsaih hi MNF thil tum a ni a, chu chu MNF foundation a ni. MNF hi kan tlak chhiat lai a awm a, kan hniam em em lai a awm a. Mahse, Pathian thuthlung kan vawn tlat avangin Pathianin kan hniam hlen a phal ngai lo a, a lo vul thar leh ṭhin. Pathian leh kan ram tan kan bei zel ang,” a ti bawk.
Pu Rama chuan, “Pathianin MNF hmelmate a sut tluk sak dan chu MNF chakna hmangin a ni ngai lo. A chawi sang te te a, an tlachhe leh mai ṭhin. PC leh Congress te a’n lal tir tak tak mai chu lal chiang tak an ni. ZPM pawh hi mipuite min hriat chian tir theih nan a lal tir zet a. Mipuiten kan hrechiang ta mek a. Engmah an lo ni lo tih a lang mek a, a ni telin an hniam raih raih a. An sorkar leh ang em, tih lam a ni lo, tun term hi an daih ang em, tih chu mipui zawhna a ni tawh a ni,” a ti.
Pu Zorama chuan, “Pathian leh mipui zarah MNF kan sorkar leh chuan District Council-a MDC te duh duha an pakai thei danna hi Parlialment-a pass tir turin theih tawp kan chhuah dawn a ni,” a ti bawk.
Er R Rohmingliana MLA, General Secretary pawhin thusawiin, “MNF chu Pathian leh kan ram tan, titu kan ni a, party dang anga awm thei kan ni lo. Rinawmna leh dikna nen theih tawp chhuahin hma kan la zel ang a, kan sorkar leh ngei ang tih ka ring tlat a ni. ZPM party hi sorkar ngawr ngawrna atana dawt sawi pawisa lo niin ka hria. An han sokara an sawi ang an nih loh zia chu kan hriat vek hi” a ti bawk.
He hunah hian Pu Vanlalhmuaka President, Lunglei MNF Sub Hqrs. leh MNF hruaituten MNF President hi an ṭawiawm a. Pu Zoramthanga chhim lam zin hi Party mipuiin an lo dawngsawng ṭhain an lo lawm hle a ni.
Pu Zoramthanga hi Er R Rohmingliana MLA leh Party hruaituten an ṭawiawm a ni.
