MPYCC chuan thuchhuah siamin, “Zonet Local Cable Television programme pakhat, Zoram Kalsiam-a host Pu Lalnuntawma Fanai-in Zoram People’s Movement (ZPM) President a kawmnaah ; ZPM President Pu Lalliansawta chuan an Val Upa Council thuchhuak chu ZPM an sorkar huna zawm tur a nih thu a sawi a. ZPM President Pu Lalliansawta tawngkam chhuak atanga a lan dan hi chuan ZPM atang hian kalphung thar pakhat mah hmuh tur a awm lo tih a lang chiang a, tun hnaia MLA hlawh tihpunte pawh Val Upa Council-te pawhin dodal ngam tura an MLA te an tih laiin, kalphung mumal nei an nih loh avangin hlawh chu a pungin a la phur phurah an tang ta mai zel zawk a nih kha.
“Mizoram mipui hmaa kalphung thar nei tura inzuarte hian eptu party an nih lai atang hauh pawhin anmahni kalphung duan an bawhchhe nghal a, an Val Upa Council rorel dan an zawm zo lo nghal ringawt pawh hian rorelna fawng vuan tlak an nih loh zia nasa takin a pholang nghal a ni. An sawi leh mipuia dik anga lan an tum ang lo zelin ZPM te hi an kal a, an MLA te motor thar lei lo tur leh hlawh punga lak dodal tura an tih zawng zawng chu an bawhchhe fai nghal ta vek a ni.
“Mara Autonomous District Council (MADC) inthlanah ZPM-te hian MADC area chhungah an party zawm thar mi 873 an lawm lut a, inthlan a zoa an vote hmuh zawng zawng an han belhkhawm chuan vote 462 chauh an hmu phak a ni. Hei hian politics ramhlui zia, inlawmluh lem leh inbumna thalo tak ; ZPM party hian an kalpui mek tih chiang takin a pholang a, tun ang laiah mipuite bum mai mai theih an ni tawh lo tih chiang takin an hria ang, anmahni an inbum mai mai zawk a ni .
“Congress party chu President thar Pu Lalsawta hovin ‘That Loh Theih Lohna Bawm’ hmangin kan insiamtha mek a, he kan kalphungah hian eptu party kan nih lai atang pawhin nasa takin kan insiamtha mek a ni. He kan insiamthatna hian Mizoram a nghawng mek avangin, sorkarna kan chelh leh hunah pawh chu ‘system’ tha hmang chuan Mizoram kaihhruai tum a ni a, mi tinte chu ‘system’ tha hmanga ram siam hna thawk turin kan sawm vek cheu a ni e,” tiin an tarlang a ni.
