Lalduhoma, ZPM Leader leh K Sapdanga, ZPM Working President-te chuan Champhai leh a chhehvel khuate an fang zel a, nizan khan Zote leh tukin khan Ngur khua te tlawhin vantlang inkhawm an nei a, Zote khuaah hian K Sapdanga, Working President chuan mi 14 lawmlutin, Ngur khuaah Pu TBC Lalvenchhunga’n PAC Member chuan mi 31 ZPM zawm thar a lawmlut bawk.
Lalduhoma chuan thusawiin, “Kan ram politics vir vel han thlir ila, Zoram mipuite’n innghahna kan neih chhun chu ZPM party hi a ni ta berin a lang. Pathian zarah nitin hmasawnna duhawm tak leh mi thar duhawm tak tak lawmluh tur kan nei te hi kan thawh rah a ni reng reng lova, min thawhsaktu a awm a ni tih hi kan chiang em em a ni,” a ti.
ZPM Leader chuan, “Kan ram dinhmun hi ngun takin han thlir ila, Kohhran pawh a mangang tawh a ni. Kumin Presbytery Inkhawmpuiah chuan sawrkar inrelbawl dan hawi zawngin agenda pass a awm nual a ni. Kohhran ten ram an vei a, kan ram leh hnam tundin tharleh an duh a, chu chu Bible atangin a dik si a ni. Thuthlung Hlui lam kan en chuan ram chhiat leh that thuah pawh ram roreltu an pawimawh em em a, a mawhphurtu ber pawh an ni. Genesis atanga Thupuan hi ngun takin en ila, he khawvela Pathian Ram a thlen theihna tura inzirtirna a ni. Kan rama Pathian ram a lo thlen theihna tur hian kan la tlai lo a, he hna thawk a kan ram siam tha turin ZPM chu kan inpumpek a ni. Mi thenkhat hi chuan sawrkar an chak chhan chu ram leh hnam an vei vang pawh a ni lo, eiru leh ila, ti rilru pu chungin ram rawng an bawl a ni. Chung mite chuan Kalphung Thar hi kan hmang tak tak ang a, kan ram hi a intodelh ang tih hi an hlau em em a ni. ZPM policy, bana kaih policy hi bultan thei bultanna nei si lote bultan tura puih a ni. Mipuite bana kai tur leh ram siamtha turin politician-te an pawimawh em em a, chutiang tur chuan ZPM hi a inpeih tawh a ni,” a ti bawk.
K Sapdanga chuan, “Kan hmalawkah inthlan kan hmachhawn dawn a, mipuite’n kan duhthlanna fim tak hmangin kan chhia leh tha hriatna thianghlim tak nen vote thlak turin kan inngen a ni. Kan party hi sum leh paiah kan innghat ve lova, Pathianin ro fel takin a rel ang a, chumiah chuan lungawi taka awm kan tum mai a ni. ZPM hi pawl hrang hrang awm khawm kan ni a, hetia lungrual taka kan awm theihna chhan chu politics-a hun rei tak lo inchiah tawh leh tawn hriat ngah tak tak te inphahhniam theihna vang a ni, Anni hian neutral kan hip theihna turin mi thar zawk hruaituah min dahin kan hnung lamah theihtawpin min thlawp tlat a, hei hi kan thatpui em em a ni. Kan hmaa inthlan lo awm tur hi political party aiin neutral-in an nghakhlel tawh zawk; a chhan chu ram kaihhruaina tur sum hi a ni lo zawnga hman chuan kan retheihpui dawn tih an hria a ni. Thluaka sum lut hi mipuiin kan vei ve ang tih hi keini ZPM chuan kan hlau ngawih ngawih a, candidate-te sum leh pai dinhmun en chunga mipuiin inthlan kan hmachhawn chuan thluaka sum lut kan vei ve tihna a ni ber ang,” a ti.
ZPM Working President chuan, “He ram hi mi hausate intihsiakna ramah i siam lo hram ang u; engtinnge kan ram a intodelh ang a, engtinnge mirethei zawkte kan dinchhuah ve theih ang tih ngaihtuah chungin vote kan thlak tur a ni. Engkimtithei Pathian kuta tluk luh hi him dam taka kan ram tundin theihna hmanraw tha ber a niin keini party chuan kan hria a, Pathian tih chungin ram rorelna hi i siam tha ang u,” a ti bawk.
