Nimin khan ZPM PAC member, TBC Lalvenchhunga; AMC Corporator, Christina Roluahpuii leh General Headquarters hruaitu dangten Rengdilah kuhva chingtute kawmin thalaite nen an inkawmho a. Tukin khan Kanmun chhehvela kudam thenkhatte enfiahin, Mitdeli lui leh Thinghluna Mizoram-Assam ramri vengtu sipaite an tlawh a. Vawiin khan Thinghlun Community Hall-ah ZPM Hachhek West Block political training an hmanpui bawk.
TBC Lalvenchhunga chuan Karimganj DC Office biain Additional DC, Pu James Aind, ACS chu thlai thar hralhchhuah kawnga kuthnathawktute harsatna tawh mek chungchang a sawipui a. Mizoram sawrkar officer thenkhatte pawh be nghalin sawrkarin rang taka kuthnathawktute harsatna sukiang tur leh, tih tak zeta hmala turin an ngen bawk.
TBC Lalvenchhunga chuan, “A hlawhtling apiang kan hlawhchham a, min chintir apiang hralhna a awm lo, suat leh a har thin. A taima leh thawkchhuak hnemte beidawnna thuk ta lutuk hi ZPM chuan na kan tihpui a, sawrkarna kan siam a nih chuan kuthnathawktute dawmkan hi hna hmasa tur a ni,” a ti.
Christina Roluahpuii chuan, “Ram tana kan inpekna hi Pathian rawngbawlna a ni. Ṭhahnemngai taka kan theihtawp kan chhuah hi Pathianin mal a sawm thin. Party ringawt ngaihtuah lova mipui tana hnathawk thei thlang chhuak tur leh, kalphung thar mipui sawrkar siam turin taima takin inbuatsaih ang u,” a ti.
Vawiin political training-ah hian resource person, TBC Lalvenchunga chuan block huamchhung atangin mi thar 63 a lawmlut a. He hun hi PC Ramdina, President chuan kaihhruaiin Upa Vanlala, Thinghlun chuan hunserh a hmang a; block huamchhung unit hrang hrang hruaitute an tel a; South Block leh North Block hruaitu thenkhatten an hmanpui bawk a ni.
