Aizawl August 16 : ZPM party chuan vawiin khan Vanapa Hall,
Aizawlah Sustainable Development & Reform Policy (SDRP) a tlangzarh. SDRP tlangzarh inkhawm hi K.Sapdanga, Working President-in a kaihruai a; Lalliansawta, President-in SDRP tlangzarhin policy-ah hian ZPM ruangam a lan thu a sawi.
Lalliansawta chuan “Nakkumah inthlanpui kan hmabak a, kan tlin ngei theih nan engnge kan tih ang. Sum sem tur kan nei lo a, kan duh hek lo; nihna emaw, hna emaw insawihmuh kan tum hek lo, amaherawh chu ZPM auhla pawimawh tak chu mitinte hi mahni leh mahni intanpui thei tura siam a ni. A mawm a awmlo a, thlantui a awm a ni. A huphurhawm a, a rit zawnga lak chuan party danga pem nawl nawlna tling a ni. Mizoram, ram nuam tak hi tun ang renga kan kal chuan smuggler paradise a chang mai ang, mihring rilru duhawm chintawk awmlo hian a welcome zel ang tih a rinawm tlat; kuhva ringawt pawh kan buaipui rei tawh dan enin chu chu a hlauhawm a ni. Rinawmna leh taimakna nen, kan tu leh fate tan mipui sawrkar, kalphung thar tungding ila, chu thawhrimna tello chuan Zoram her luai luai tawh hi kan tungding zo lo ang tih a hlauhawm a ni. Chutiang tur chuan ZPM-a ka thawhpuite leh Zoram mipuite ka sawm a che u; kan thlantui i ui lovang u,” a ti.
ZPM Leader Lalduhoma chuan, “Kan policy kha a buah chuan a zawng zawng a tih theih loh a, a bu chhah zawk a la awm a ni; chung zawng zawng innghahna chu Mizoram rorelnaah Pathian ram lo thleng rawh se tih hi a ni. Hei hi ZPM lungphum, kan policy innghahna a ni. Sam ziaka kan hmuh angin, leilung leh a chhunga thil awm zawng zawng hi Pathian ta a ni. Pathianin leilungah lalram din a duh a, chu mawhphurhna chu mihringte kutah a nghat a ni. Genesis atanga Thupuan kan en chuan, he leia kan hman tur deuh vek a ni. Nazareth Manifesto leh Lal Tawngtaina kan khaikhawm chuan, Pathian duhzawng tih a ni mai; tunah, hetah kan ramah ngei pawh hian Pathian ram thlentir turin min zirtir a ni,” a ti.
Dr. KC Lalmalsawmzauva, General Secretary i/c Policy & Research chuan policy chungchang sawizauna neiin, “Policy hi kan inziah that siak lo a, Research based-a duan a ni. Kan leiba chhawm chhoh tur ngaihtuahna avangin policy-a kan dah tam tak erawh kan phawrh ngam rih lo. Sem policy kan zuar lo a, SDRP hi mi taima leh thawkrim te tana duan a ni. Kuthnathawktute kan dah pawimawh ber dawn a, an pualin budget-ah pawh sum kan dah ang. Progressive tax hmangin land reforms kan kalpui dawn a, Zau beihpui kan thlak dawn bawk. Thalaite entrepreneurship lamah an kal theih nan sawrkar chu facitator-ah kan tang dawn a ni. Sustainable development kan kalpui dawn a, kan environment dah pawimawh ber chungin hmasawnna kan kalpui ang. Minimum support price leh crop insurance te kan leiba chhawm chhoh tur ngaihtuahin fimkhur takin kan kalpui dawn. Tlawng kan khuap ang a, electric bill kum 5 chhungin kan tipung dawn lo thung. Contract hnate open tender hmanga thlan thin a ni ang a, contract hna hralh chhawn erawh phal a ni lo. Education-ah rationalisation of teacher mai bakah rationalisation of institutions kan kalpui dawn; Professional course kan uar dawn a, job based oriented-in kan kal ang. Health-care changtlung zawk kan kalpui dawn a, tin, kum upa te tan thlatin pension 1000/- kan pe dawn a ni,” a ti.
