Vawiin April 4, 2024 (Ningani) hian Siaha Bazar-ah MP (LS) Campaign pualin vantlang inkhawm neih a ni a, he hun hi MPF te kaihhruaina hnuaia hman niin Lalrinpuii, Health Minister-in thu a sawi.
Lalrinpuii chuan,” MPF awmna apiangah ZPM Party hi chu kan thla a muang thin a, Candidate-te tan a zangkhaiin, sum sen hautak tur min venpui a ni. Pathianin ram hruaitu turin mi ruat a nei thin a, tun hi ZPM Party tana chunglam hun ruat niin ka hria. Min enchhin rawh u tiin inthlahrung takin mipui kan ngena, mahse en chin main i lovin beiseina sang tak nen sorkarna min pe ta hi kan lawm hle a ni. Kumin MP inthlan ah pawh hian duhsak taka min hlan kai leh ngei kan beisei a, chutih rualin BJP sangawizawnpui MP kan nei leh ang tih hi thil hlauhthawnawm tak a ni a, kan ram leh kan sakhuaah nghawng tha lo tak nei thei a nih avangin kan fimkhur angai a ni, kan ram, kan hnam leh sakhua a dam theih nan tun MP inthlan lo awm turah hian kan vote-na tur hi kan chian a ngai a ni,” a ti.
Lalrinpuii chuan, “Tunge inthawhpui ang tiin min zawt fo a, keini chuan, “Central sorkar-ah tu pawh sorkar se an bawihah tang lovin thianah siama thawhpui kan tum, anmahnia lut si lovin issue based in huai takin kan che dawn a ni,” tih hi kan chhanna leh nghet taka kan dinna a ni. MP atana kan chhawp chhuah Richarh Vanlalhmangaiha hi vairama piang a seilian, vai tawng leh sap tawng mahni tawng ang maia thiam, vai ho nunphung leh zia hrechiang em em tu a ni a, Mizoram mipuiin kan mamawh engkim min thlensak theitu tur kan mi mamawh tak a ni,” a ti bawk.
Lalrinpuii hian ZPM zawm thar mi duhawm tak tak mi 708 lai lawmlutin heng zingah hian Ex-MDC pakhat leh VC Member Sawm pakhat te pawh an tel a, Theiri-ah Voter 126 lawmlutin hetah hian VC Member 2 an tel bawk. Tipa-ah mi 441 lawmlutin heng zingah hian VC Member 6 an tel bawk a ni.
