Aizawl, 11th April, 2022 : Vawiin khan ZPM chuan Chhung Inkhawm hun an hmang a, he hunah hian President Pu Lalliansawta chuan LC by-election zawh taka ZPM official candidate-te fuihna thu tawi a sawi a; Aizawl North-I MLA Pu Vanlalhlana chuan thu sawi bawk a ni.
Pu Lalliansawta chuan LC by-election-ah beisei san har tak chunga huaisen taka lo penchhuak te fakawm a tih thu sawiin, “Inthlanah reng reng chuan tling leh tla kan awm a, khawvel hruaitu ropuite pawh vawi engemawzat tlak hnua rawn thochhuak leh te an ni, kan theihna zawn apiangah tih tak taka ram leh hnam rawngbawl zel turin insangmar sauh sauh ang u,” a ti.
Pu Vanlalhlana, MLA chuan hunserh min hmansaktute thusawia thil inang awm tlat thin chu ropui a tih thu sawiin, “Hunserh min hmansaktu apiangten ‘nangni hi Zoram siamtha tura mipuite beisei awmchhun in ni, nangni lehzel beisei tur awm lova in awm chuan Zoram mipuite tan beisei tur a awm tawh lo’ tiin an rawn sawi fo a, hei hian kan nihna a sawi. Chuvangin chunglam mitmei veng chungin fimkhur takin i awm ang u. Kan hmasawn dan te hi ngun taka chhut chuan ‘Pathianin min hruaina a ni’ a tihloh theihloh a ni. Kan thawh em em pawh nilovin, kan tana tha lo tur emaw kan tih kha a lo tha zawk zel a, lehlamah Party dangte chuan thil tha ti intiin au ring viau mah se, reiloteah thil nihna dik tak a lo lang a, thil tha tih an tumna kawng hi an tan hmingchhiatna kawng a lo ni leh thin. Tunhnaiah kan hruaitute hmun hrang hrangah an zin a, kan boruak a tha hle mai, he boruak tha hi i chhawm nung zel ang u,” a ti a. Pu Hlana chuan pawn lam atanga min tichhe thei an awm loh thu sawiin, hruaituten awmdan kan thiam a tul thu a sawi bawk.
Dr. Vanlalthlana chuan MADC inthlan awm tur atana campaign bulṭanna boruak a nawm thu sawiin, “Chhimlamah ZPM sawrkar siam duhna a lian hle tawh a ni,” a ti.
Tunhnaia zin chhuak group pali- MLA team, Lengteng bial team, Serlui bial team leh MADC team ten zin report an pe a. ZPM Leader Pu Lalduhoma hova fehchhuakten Lengteng bial khaw 19 an tlawhin mi thar 1033 zet ZPM chhungkuaah an lawm lut niin an sawi bawk.
