ZPM Spokesperson K.Laltluangkima chuan, “Kan CM hian inthlan hma khan, ‘ZPM Chief Minister chu car man to ah a thu dawn lo” a ti a nih kha. Hei ZPM chuan CM chu kan han nei ta a. CM hlui car chu an chhawm ve ta a. He a car chhawm hi kum 15 vela upa tawh repair reng ngai kha anih tak avangin CM chu car thar Toyota leisak a ni ta a. Hetiang car hi mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni,” tiin CM dinhmun ngaihtuahin Car man to a ni lo,” a ti..
“Mizoram hi international ram depa awm kan nih avangin kan CM hian Z+ category security a nei a. Kan CM in campaign laia ‘Car man tovah a chuang lovang’ a tih hun lai nen khan thil a danglam nasa tawh hle a. Kawl ramah pawh Kawlho chang an do lova, Zo hnahthlak leh Zo hnahthlak te pawh an indo tawh a ni a, chutiang khawp chuan kan ram dep ho hi a ralti a; chutih lai kara car man tlawm ber mai kan ram lal ber tana lo la hisappui tlat hi chu thil intu lo tak a ni tawh. Chutih lai karah hetiang car satliah a a inhnukhniam thei hi chu fak mawlh mawlh tur zawk a ni dawn lawm ni?,” a ti bawk.
K.Laltluangkima chuan vawiina chanchinthar lakhawmtute a kawmnaah, “Mizoram Congress Spokesperson Dr. Lallianchhunga chuan ni 24 July 2025 khan Sairanga sawhthing lei khawlsa dahna hmun a tlawh a. Hetianga Congress pawhin lo neitute hmakhua an ngai ve ta hi lawmawm kan ti hle a. Sawhthing dah tawih a tih ho kha erawh chu sawhthing hralh tlak leh hralh tlak loh thliarna lama tha lo zual paih te an ni a. Thlai thar hi sawngbawl an ngai thin a, loneituten a chhia leh a tha an dah pawlh chuan lo thenfai angai thin tih kan hriat vek kha. Eng pawh ni se, Congress unaute sawhthing ngaihvena an han pen chhuak ve ta hrim hrim hi a lawmawm a. An thusawi lar tak thin chu ‘In sawhthing hi ching rawh pawh kan ti lova, leisak che u pawh hi kan ba lo’ tih kha a ni a. Vawiinah erawh chuan ZPM sawrkar-in thiam ang angin lo neitute tanghma ngai takin kan han buaipui ta nawk nawk a, party ropui tak tak sawhthing lo ngaihsak ngai lo te pawh kan kai harh ta niin a lang a, a lawmawm em em a ni.
“Ni 25 July 2025 Zalen chanchinbu chhuakah chuan ‘MNF in Fisheries Dept pawisa nuaih 100 awmna sorkar an zawt,’ tih a lang kuau mai a. Chheprelh tih te, tibothlau tih te, a lan nual avang hian MNF unau te hian thil hi an hre thei si a; sum hi chheprelh a nih theih dan te, a bo thlau theih dan kawng hrang hrang te an thiam nal tawh si a, an hlauh thawn hi a lo dik tak tak mai ang a, tiin hlau thawng chung chungin ka umzui a. A tawpah chuan engmah hlauhthawn tur a lo awm lova. Engkim a fel fai a ni tih sorkar lamin min hrilh ta a, Kan Minister zahawm tak Pu Chatea pawh kan hmu khaw lo hman tep a ni,” a ti a. “A amount hi nuaih 100 ni lovin nuaih 1000 lai a ni a. An sawi ang hian 25.4.2025 ah sanction hmuh a ni a. Tichuan budget allocation dil thuai a ni a. 27.5. 2025 khan Expenditure sanction dil leh mek a ni a. Reserve Bank of India in him takin tunah hian an kawl mek a ni,” a ti bawk.ZMP Spokesperson chuan, MUHCS chungchang sawiin, “Zonet buatsaih mi hrang hrangin MUHCS THLIRNA DANG tih program a an hmuh dan an sawinaah khan Dr. K. Beichhua MLA zahawm tak khan he ‘MUHCS laimu atan ABPMJAY rinchhanin he Health Care hi siam a ni tih tunah chuan kan chiang tawh a,’ a ti a. Heta a laimu a tih hian a kawh nia lang chu, ABPMJAY hi rinrawl leh a main bera hmangin MUHCS hi an din a ni, a ti niin a ngaih theih a ni.
“He MUHCS kan buaipui mek leh sawhthing hian a tlangpuithuin inanna tak an nei a. Sawhthing pawh hi a hralh tur nei lo ho hi a sawiseltute an ni a. Sawhthing hralhtute chu an lawm em em a, an mittui a tla a. MUHCS pawh hi a hmang tawh tute chu an lawm em em a, la hmang ve lo te hi sawiseltute an ni tlangpui bawk a. Hei hian a sawi fiah em em chu ZPM sorkar ral khat atanga do mai lovin an mahniah hian rinna nghah ngam a pawimawhin a ni. MUHCS hi Dr. Beichhua hriat dan ang lo takin ABPMJAY laimu emaw a kungpui ber emaw ni lova, a zar peng tiin sawi ta zawk ila a dik awm e,” a ti bawk.
