ZPM Spokesperson K.Laltluangkima chuan vawiin khan chanchinthar lakhawmtute kawmin, “Ni 20.9.2024 khan kan Chief Minister chuan MSC khawmpuiah thu a sawi a. Chutah chuan kan rama hna tha taka kan thawh theih nan Contract agreement tha kan neih a pawimawh thu a sawi a. Chuta a thusawi chu ni 24.9.24 khan MNF lamin an rawn chhang let a ni,” tiin a hnuai ami ang hian a an chhanlet ve thu a sawi.
ZPM Spokesperson chuan, “Sadguru Engineers & Allied Services Pvt. Ltd. te hian heng kawngte hi an siam a:-
(i) Bairabi Railway Station to Bilkhawthlir
(ii) Bilkhawthlir to Kolasib
(iii) Kawnpui to Khamrang.
“Pu K. Lalsawmvela hian, Kawnpui to Khamrang kawngte hi EPC Mode contract hmanga agreement siam an nih thu tarlangin, PWD mawhphurhna chu a rawn sawi bo titih a.
“EPC Contract Agreement hmang chuan April ni 19, 2021 khan agreement chu ziak ngei a ni. Agreement sign-tute chu – Ministry of Road Transport & Highways (MoRTH) aiawhin Mizoram PWD Chief Engineer (Highways) leh Sadguru Company te an ni.
“Kawnpui to Khamrang kawng Km 15 a sei hi, work-order kan tih mai, LOA – Letter of Acceptance chu, sorkar khan January ni 25, 2021 khan a pe a. LOA ah hian contractor te hian Contract Agreement hi ni 30 chhungin an sign fel tur a ni, tih chiang takin a inziak a ni. Contract Agreement sign fel tur hian Performance Security Rs. 35,37,000 an dah nghal tur a ni tih a ni bawk. Ni 30 chhunga contract agreement an sign hman loh chuan extension an dil thei a, ni 60 chhung chuan Contract Agreement an sign fel ngei ngei tur a ni tih a ni. Ni 60 chhunga agreement an sign hman loh chuan hna hi pek loh tur an ni a, Tender an chhan laia Bid security kha an chan vek tur a ni. Amaherawhchu Sadguru te hian dan an bawhpelh nasa hle a, Contract Agreement hi work order / LOA an hmuh ni atanga a ni 80 zet, April ni 19, 2021-ah an sign chauh a ni.
“Performance Security te pawh hi EPC Contract Agreement danah chuan contract amount atanga 5% dah tur tih ni si, 3% chauh an lo dah a ni. 5% chu dah se Rs. 58,95,000 a ni ang.
“Kawnpui to Khamrang kawngah hian Contractor Sadguru te hian hna an zawh ni, Completion Certificate (6 May 2022 ah pek an ni a) an neih ni atangin kum 3 chhung (6 May 2025) kawng hi an enkawlzui zel ang a, a chhe lai siam thain an maintain zel tur a ni, tih a ni a. Chumi hun chhung chu Defect Liability Period tih a ni. Mahse, Defect Liability Period chhunga kawng siam nana sum awm zat chu Nuai 12.54 chauh a ni si. Heti zat lek kawng repair-na atana sum a awm hi kan CM khan tlem a tihzia a sawi lang a nih kha. Hei hi a tlemna chhan chu, kawng repair-na atana hman turin Contract Agreement-ah “Contract amount atangin 1% chauh a ni ang”, tih a lo dah vang a ni. ( Helai 1% hi Pu Sawmvela hian a Press Conference ah khan 1% hi EPC guidelines ang a ni a, Contractor duhsak vang a ni lo, hlawkna tem ve duh vang a ni lo a ti a. Mahse han bih thuk deuh chuan 1% kha an mahni State PWD lamin an rawt (propose) a ni lawi si.)
“Defect Liability Period pawh hi EPC Contract Agreement ah hian kum 5 tih te kum 3 tih te a chuang a, duh zawk zawk thlan theih ang deuh vin, heng te hi chiang faka ziak a nih loh vang hian Sadguru hian kum 3 zawk a thlang mai a ni.
“Sadguru company te hian, kum 3 chhung, Defect Liability Period chhunga kawng repair leh maintenance an thawh tur kha, run dal tak tak chauhvin an thawk a. Vawi eng nge maw zat thawk tha tura hrilh an nih hnu pawha an awih loh zel avangin, Show Cause Notice te pawh pek an ni hial a, mahse show cause notice pawh an chhang ngai lo a ni.
“Chutiang anih tak avang chuan Mizoram sorkar chuan Regional Office, MoRTH, Guwahati office te hriatpuinain Sadguru te hna chu Ni 4.9.2024 khan cancel tura thutlukna siam a lo ni ta a, Sadguru te pawhin sorkar an khin zui zel loh nan leh sorkarin a khinzui loh nan, an contract tih tawpsak (foreclose) chu an lo dil ve bawk a, inhrethiam tawnin Performance Security Rs. 35,37,000 pawh chu Mizoram sorkarin, kawng siam nan, an laksak (forfeit) ta a ni.
“Bairabi to Bilkhawthlir, FCI buhfai kan phurhna kawng pawimawh tak mai pawh hi Sadguru contractor te hian ni 29.9.2026 thleng a enkawlzui tur a ni a. Lei min tlem a paih tih mai loh chu kawng repair hna thawh a nei lo. Chuvangin, ZPM sorkar chuan ni 4.3.2024 khan contractor hi Show Cause Notice a pe ta a. Contractor hi han hrem dan dang a awm mang bawk si lo va, thawhzui a tum tawh si loh avangin, ni 4.3.2024 khan tihtawpsak a ni ta a. Performance Security Rs. 49 lakh pawh a laksak (forfeit) bawk.
“Heng kawngte hi Sadguru mawhphurhna liau liau a ni a. An enkawl tur hun chhung (Defect Liability Period) a zawh hnuah NHIDCL kuta hlan tur a ni. Chu hun chu a la tawp loh avangin NHIDCL hian an la duh bik si lo va. Kawng chhia avangin mipuiin kan tuar tawh bawk si a. PWD mawhphurhna a ni miah lo chungin, sorkar chuan ama sum sengin a siam tha tan ta ringawt mai a ni e.
“Pu K. Lalsawmvela hian PWD ten dan bawhchhiat an neih loh thu a sawi hi a dik thui viau a. CM hian PWD in dan an bawhchhiat thu a sawi hauh lo. Agreement fel tawk lo, sorkar lam chan chau saa siam thin hi CM hian tihtawp a duh a, action lak zel a nih tawh tur thu huai takin a sawi mai a ni. CM thusawi hi mahni lo inngaihbel tan lo chuan han helh tur a awm lo ve.
“World Bank suma kawng an laih lai khan, Chhimphei thalaite lungawi lo khan kawng zawh hial an tum a, Police ten an dang a nih kha. Khatih lai khan PWD Officer lian tak pakhat in chu “World Bank House” tia vuah a ni nghe nghe a nih kha.
“Pu Sawmvela hian MNF sorkarin an sorkar tirha kawng an siam that thu a sawi lang bawk a. Assembly House-ah hial lawmthu sawina Resolution pawh pass a ni a, kan la hre theuh awm e. Congress thalai thuchhuah MPYCC/Pub/2019-20-21 Dt 31-8-2019 in a tarlan dan chuan, Cogress Sorkarin kawng siamna leh repair-na tur hman bang Rs190 cr lai an hnutchhiah hmangin MNF Sorkar khan kawng an siam tha tih an tarlang a. ZPM sorkar erawh chuan sum hman bang rochun tur a nei ve tlat lo a ni. Amaherawh chu khang kawngte khan fur khat bak an daih loh avangin tunah hian a nghawng chu kan tuar mek ta a nih hi.
“Kan kawngte a chhiat chhan ber hi chu a bul atangin Agreement a fel tawk loh vang leh monitor-zui a nih loh vang hi a ni.
“Chuvangin, sorkar chuan party tin leh NGO leh Kohhran aiawh te telna Project Monitoring Committee a din ta a, Project 50 vel lai endik a ni tawh a, chungte chu ZPM sorkar hma thil vek a ni.
“Sawi tak ang hian, Bairabi to Bilkhawthlir te, Bilkhawhthlir to Kolasib te, Kawnpui to Khamrang te hi Sadguru ho hna vek a ni a. Heti khawp hian an thawk chhia a, hrem theih loh tur siin Agreement an sign a. Hetiang taka hma lo latu Ministry hmasaa mite zingah khan a tuihang hawptu an awm ngei ngei ang tih hi kan ring hlel lova. Tunah kawng chhiat chhanah ZPM sorkar namen lovin an puh leh si hi thil runthlak tak a ni. Hetiang thil thalo infawkkhawm hi ZPM hnuaiah chuan a awm ve tawh tur a ni lo.
“Mizoram sorkar hian thil hi dik leh awmze neia rorelna kalpui hi tunah chuan a tum tawh a. Chumi ah chuan hrut zeuh zeuh hi chu tu tu emaw a nei dawn a. Mipui te pawhin kan sorkar thlawp ila, kan lo tuar ve ta deuh a nih pawhin kan tu leh fate leh kan ram a din khawchhuahna tur bul intanna a ni tih hriain, tuarchhel tur leh dawh thei tur te, mahni ta ta chauh en lova Ram pum anga kan en hram hram a pawimawhzia te i hre thar leh ang u,” a ti.
