Thentlang 26th March, 2022 : Vawiin khan Thentlang YMA Hall-ah ZPM Tuikum Block buatsaihin Political training hun hman a ni.
He hun hmanpuitu Pu Phairothanga chuan thusawiin,” Sawrkar kan hrawn mek leh kan hrawn tawh ten Kohhran leh Tlawmngai pawlte duh dan hi an zawm tawk lo a. Kohhran chuan a dikte, a ṭhate leh a zahawmte an duh ṭhin a, tlawmngai pawlte hian hmuh theih hmasawnna aiin chhungril nun siam ṭhat hi an ngai pawimawh ṭhin. ZPM kan sawrkar chuan Kohhran leh Tlawmngai pawlte duh dan theihtawpa tihhlawhtlin dan kan ngaihtuah dawn a ni” a ti a. “Dan in awmzia a neih a, mipui vantlang ten kan chanvo leh dikna kan hum theihna tûrin ZPM kan sawrkar a ṭul a ni” a ti bawk.
He hunah hian ZPM zawm thar mi 22 lawmluh nghal a ni a, lawmluhna hun hmangtu Pu Lalṭhazuala Rawite, General Secretary, i/c Organisation South chuan thusawiin,”Tûnah hian kan ramin bung thar kan kai mek a, hmuntin atangin ZPM party zawm thar an awm reng a ni” a ti a.” Heng mi thar duhawm tak tak te hi keini ZPM party chuan party dangte angin thil lo pek let tur kan nei ve lo a, ram leh hnam tan huaisen takin an rawn pen chhuak a ni. Ṭhenkhat chuan vau hialte an tawk tih kan hria a, huaisen taka ‘Kalphung Thar’ an rawn zawm hi kan fak hle a ni” a ti bawk.
Baryl Vanneihsangi AMC Councillor Ward XIX pawhin thusawiin,”Politics hi eizawnna tur ni lovin ram rawngbawlna tur a ni a. Lawmman leh ropuinate zawng lovin ram leh hnam hmasawnna kan ngai pawimawh zawk tur a ni a; kan ramin ‘Social and Moral Reform’ kan mamawh em em a, chumi thlen tur chuan mimal tinte kan pawimawh a ni” a ti a. “Ṭanrual hi chakna a ni a, kan ram leh hnam dinchhuahna turin lungrual taka Pathian malsawm tlaka ṭangrual turin kan in chah a ni” a ti bawk.
He hun hi Pu F. Lalrosanga, President, Tuikum Block in kaihruaiin Pu Lalengmawia, Secretary, Thenzawl Unit in hunserh ṭawngṭaina hun a hmang a ni.
